“Aholiga sifatli ijtimoiy xizmat va yordam ko‘rsatish hamda uning samarali nazorat tizimini yo‘lga qo‘yish bo‘yicha kompleks chora-tadbirlar to‘g‘risida”gi prezidenti qarori qabul qilindi.
Farmon bilan prezident huzurida Ijtimoiy himoya milliy agentligi, shuningdek, uning Qoraqalpog‘iston Respublikasi, viloyatlar va Toshkent shahar boshqarmalari hamda tuman (shahar)larda “Inson” ijtimoiy xizmatlar markazlari tashkil etiladi.
Quyidagilar agentlik tuzilmasiga o‘tkaziladi:
- 2023-yil 15-iyundan boshlab Kambag‘allikni qisqartirish va bandlik vazirligi tizimidan:
- Tibbiy-ijtimoiy ekspertiza inspeksiyasi va uning hududiy bo‘linmalari;
- Nogironligi bo‘lgan shaxslarni reabilitatsiya qilish va protezlash milliy markazi hamda uning hududiy markazlari;
- Ayollarni reabilitatsiya qilish va moslashtirish respublika markazi hamda uning hududiy bo‘limlari;
- Odam savdosi jabrdiydalariga yordam berish bo‘yicha respublika reabilitatsiya markazi;
- keksalar va nogironligi bo‘lgan shaxslar uchun “Muruvvat” va “Saxovat” internat-uylari;
- Urush va mehnat faxriylari uchun respublika pansionati;
- keksalar, nogironligi bo‘lgan shaxslar, urush va mehnat faxriylari uchun sanatoriylar.
2024-yil 1-yanvardan boshlab:
- Sog‘liqni saqlash vazirligi tizimidan bolalar uylari;
- Maktabgacha va maktab taʼlimi vazirligi tizimidan mehribonlik uylari;
- mahalliy ijro etuvchi hokimiyat organlari tizimidan voyaga yetmaganlar bilan ishlash sektorlari hamda oilaviy bolalar uylari.
2024-yil 1-avgustdan boshlab:
- Maktabgacha va maktab taʼlimi vazirligi tizimidan alohida taʼlim ehtiyojlari bo‘lgan bolalar uchun ixtisoslashtirilgan maktablar va maktab-internatlar ko‘p tarmoqli ixtisoslashtirilgan maktabgacha taʼlim tashkilotlari hamda ixtisoslashtirilgan o‘quv-tarbiya muassasalari;
- Oliy taʼlim, fan va innovatsiyalar vazirligi tizimidan imkoniyatlari cheklangan shaxslar uchun ixtisoslashtirilgan kasb-hunar maktablari.
2025-yil 1-yanvardan boshlab:
- Ichki ishlar vazirligi tizimidan muayyan yashash joyiga ega bo‘lmagan shaxslarni reabilitatsiya qilish markazlari;
- Iqtisodiyot va moliya vazirligi tizimidan Ijtimoiy sug‘urta jamg‘armasi.
O‘zbekiston Milliy paralimpiya qo‘mitasining Paralimpiyachilarning matonat maktabini 2023-yil 15-iyundan agentlik tuzilmasiga o‘tkazish hamda Paralimpiya sport turlari bo‘yicha mutaxassislarni tayyorlash institutining faoliyatini hamkorlikda muvofiqlashtirish bo‘yicha taklifi maʼqullandi.
Belgilanishicha, mazkur bandda ko‘rsatilgan tashkilotlar va tarkibiy tuzilmalar amaldagi moliyalashtirish manbalari, shtat birliklari, huquq va majburiyatlari, mol-mulki hamda boshqa tovar-moddiy boyliklari bilan birgalikda to‘laligicha agentlik tuzilmasiga o‘tkaziladi.
O‘zLiDePdan O‘zbekiston prezidentligiga nomzod Shavkat Mirziyoyev o‘z saylovoldi dasturida O‘zbekistonda hozirgi 6 ta vazirlikda tarqoq bo‘lgan ijtimoiy xizmatlar birlashtirilib, Ijtimoiy himoya milliy agentligi tashkil etilishini ma’lum qilgandi. O‘shanda agentlik o‘zida hozirgi 6 ta vazirlik (Kambag‘allik, sog‘liqni saqlash, maktab ta‘limi, moliya, ichki ishlar, oliy ta‘lim)da tarqoq bo‘lgan ijtimoiy xizmatlarni birlashtirishi aytilgan edi. Yangi agentlik uchun kamida 10 foiz xodimlar nogironligi bo‘lgan shaxslar orasida tanlov asosida ishga olinadi.
Izoh (0)