Rossiya Ukrainaga bostirib kirishi chog‘ida prezident Vladimir Putin qo‘ygan maqsadlarning birortasiga ham erisha olmadi, deya e’tirof etdi Davlat dumasining MDH ishlari, Yevrosiyo integratsiyasi va vatandoshlar bilan aloqalar qo‘mitasi raisining birinchi o‘rinbosari, “Yedinaya Rossiya” a’zosi Konstantin Zatulin.
Rossiya “Ukrainaning denatsifikatsiyasi, demilitarizatsiyasi va betarafligiga” erishmoqchiligini, shuningdek, o‘zini mustaqil deya e’lon qilgan Donetsk va Lugansk xalq respublikalari aholisini “himoya” qilayotganini rasman aytib o‘tgandi, — deya eslatdi deputat.
“Ushbu nuqtalardan qaysi biri bo‘yicha natijalarga erishdik? Bundan tashqari, ularning ba’zilari hech qanday ma’noga ega bo‘lmay qoldi. Masalan, Ukrainaning betarafligi. Ushbu talabning ma’nosi nima? Hozirda hech qanday ma’no yo‘q. Ukraina mavjud bo‘lib qolsa, neytral bo‘lmaydi”, — dedi Zatulin.
Uning fikricha, G‘arbning hozirgi qo‘llab-quvvatlashi bilan Rossiya Ukrainani egallab ololmaydi. “Savol shuki, Ukraina Zelenskiy yoki uning vorislari boshchiligida sodir bo‘layotgan barcha voqealar natijasida mavjud bo‘lishda davom etadimi yoki yo‘qmi? Ukraina mavjud bo‘lishda davom etadi, chunki ular olgan qo‘llab-quvvatlash bilan ukrainlarni yengishga kuch yetmaydi”, — dedi Zatulin.
Uning fikricha, Rossiya rahbariyati bu mavzuda ochiqchasiga gapirmasa-da, mavjud vaziyatdan xabardor ekanligini “aniq ko‘rsatmoqda”.
Izoh (0)