So‘nggi o‘n yilliklarda qahvaning obro‘siga putur yetdi. Hammasi 1991-yilda JSST uni potensial kanserogen deb ataganidan boshlandi va 2016-yilga kelib u hech qanday kanserogen emasligini tan oldi. Shu bilan birga, Kaliforniya sudi ishlab chiqaruvchilarga saraton kasalligining rivojlanish xavfi haqida ogohlantirishni buyurdi: qahva qovurilganda, o‘zidan kanserogen hisoblangan akrilamid moddasini chiqaradi (va hatto bu ham isbotlanmagan: Akrilamidning dozasi inson dozasidan o‘nlab marta oshib ketganda saraton ba’zi laboratoriya kalamushlarida rivojlandi). Biroq qahvani oqilona iste’mol qilish sog‘liq uchun juda ko‘p foyda keltirishini bilish muhimdir, deb yozadi The Voice Mag nashri.
Qahva saratonning ayrim turlari rivojlanish xavfini kamaytiradi
Qahva mingdan ortiq komponentlarni o‘z ichiga oladi, ularning ko‘pchiligi yallig‘lanishga va o‘simtaga qarshi ta’sirga ega. Qahva melanoma va leykemiya, shuningdek, prostata va bachadon saratoni xavfini kamaytirishi bilan bog‘liq. Janubiy Kaliforniya universiteti tomonidan olib borilgan tadqiqot shuni ko‘rsatdiki, kofe ichuvchilarda ichak saratoni rivojlanish xavfi 26 foizga kamaygan.
Kofe 2-toifa diabetdan himoya qilishi mumkin
Uning odatiy shakli ham, kofeinsiz qahva ham. Qanchalik ko‘p qahva ichsangiz, diabetga chalinish xavfi shunchalik kamayadi. Ammo kuniga 250 ml dan 4 stakandan ko‘proq qahva ichsangiz, uyqu muammolari va migren paydo bo‘lishi mumkin. Qahvaning foydali ta’siri uning tarkibida xrom mavjudligi bilan bog‘liq bo‘lib, u insulinning qonga singishiga yordam beradi.
Qahva Alsgeymer kasalligi xavfini pasaytiradi
Kofein miyaning yaxshi ishlashiga yordam beradi. Hozirgacha bu mavzu bo‘yicha bir nechta tadqiqotlar mavjud, bu yerda qondagi kofein darajasi va demensiya rivojlanishi o‘rtasida bog‘liqlik o‘rganiladi.
Yurakni himoya qiladi
Ko‘p yillar davomida yurak ritmi buzilgan odamlarga qahva ichmaslik tavsiya etilgan. Ammo ma’lum bo‘lishicha, bu ichimlik arterial fibrilatsiyani 13 foizga kamaytiradi. Bundan tashqari, qahva ichuvchilar uni ichmaydiganlarga qaraganda yurak xurujiga 19 foizga va infarktga moyilligi 30 foizga kamaygan.
Umrni uzaytirishi mumkin
Ma’lum bo‘lishicha, kuniga 4 finjon qahva ichadiganlar odatda yurak yetishmovchiligi va saraton kabi ko‘plab sabablar oqibatida yuzaga keladigan o‘limni kechiktiradilar. Ushbu mavzu bo‘yicha tadqiqot 2016-yilda Yevropa Epidemiologiya jurnalida nashr etilgan.