UzAuto Motors matbuot xizmati ijtimoiy tarmoqlarda iyuldan boshlab Chevrolet Cobalt va Gentra narxlari oshishi aytilgan xabarlarga munosabat bildirdi.

“UzAuto Motors bu bo‘yicha hech qanday ma’lumot taqdim qilmagan. Ushbu ma’lumotlar hech qanday asosga ega emas va yolg‘onligini ta’kidlab o‘tish kerak”, — deyiladi munosabatda.

Kompaniya turli sahifa egalarini odamlar e’tiborini tortish uchun ular qiziqqan yo‘nalishda biror-bir faktga asoslanmagan axborotni tarqatmaslikni so‘ragan.

“Kompaniya va mahsulotlar narxi haqida rasmiy sahifalarimiz orqali bilib olishingiz mumkin”, — deya ta’kidlanadi xabarda.

UzAuto Motors may oyi boshida Chevrolet Onix va Tracker avtomobillari sotuvini to‘xtatgandi. Kompaniya 2022-yilda hamyonbop modellardan Spark, Nexia, Cobalt va Lacetti avtomobillari sotuvini to‘xtatib, Onix va Tracker uchun shartnomalar tuzishni boshlagan. Biroq 2023-yil may oyi boshidan narxi 207 million so‘mlik Onix va 211 million so‘mlik Tracker sotuvi to‘xtab qolgan. 25-maydan boshlab UzAuto Motors Tracker va Onix avtomobil modellarining yangilangan komplektatsiyalari uchun shartnoma berishni boshladi.