O‘zbekistonda “yashil” energetikaning bugungi holati va rivojlanish yo‘nalishlari o‘rganildi. Bu haqda Makroiqtisodiy va hududiy tadqiqotlar instituti xabar berdi.
2022-yilda O‘zbekistonda quvvati 200 MVt ga teng bo‘lgan quyosh elektr stansiyalari yordamida 411 mln kVt/s elektr energiyasi ishlab chiqarildi. Bu esa 124 mln metr kub tabiiy gazni tejash, atmosferaga 164 ming tonna zararli gazlar chiqarilishining oldini olish imkonini berdi.
2022-yilda quvvati 2 072 MVt ga teng bo‘lgan gidroelektr stansiyalari vositasida 6,48 mlrd kVt/s elektr energiyasi ishlab chiqarildi. Natijada 1,94 mlrd metr kub tabiiy gaz tejaldi va atmosferaga 2,71 mln tonna zararli gazlar chiqarilishining oldi olindi.
Mamlakatda 2026-yilga borib, quyosh va shamol elektr stansiyalari quvvatini 8 000 MVt gacha, gidroelektr stansiyalari quvvatini 2 920 MVt gacha oshirish rejalashtirilgan.
Buning natijasida qayta tiklanadigan energiya ulushi 25 foizga yetadi, 3 mlrd metr kub tabiiy gaz tejaladi va 1 mln xonadon 1 yil davomida gaz bilan ta’minlanadi.
2023—2030-yillarda O‘zbekistonda 11 ta yirik, 9 ta o‘rtacha va 8 ta kichik va mikro gidroelektr stansiyalarni qurish rejalashtirilgan.
Shuningdek, yangi GESlarni ishga tushirish tufayli yiliga 5,8 milliard kVt/soat elektr energiyasi ishlab chiqariladi va 1,74 milliard metr kub tabiiy gaz tejaladi.
Avvalroq YIB O‘zbekistonning quyosh elektr stansiyalarini qurish uchun 83,6 mln dollar ajratishi haqida xabar berilgandi.
Izoh (0)