O‘zbekiston Markaziy banki ijtimoiy tarmoqlarda banklar ustav kapitalining eng kam miqdori bo‘yicha qo‘yilgan talablarga sakkizta bankning kapitali javob bermasligi haqida tarqalgan xabarlarga munosabat bildirdi.
Qayd etilishicha, “Banklar va bank faoliyati to‘g‘risida”gi qonunining 13-moddasiga kiritilgan o‘zgartirishlarga ko‘ra, bank ustav kapitalining eng kam miqdori 2023-yil 1-sentabrdan boshlab 200 milliard so‘mni va bosqichma-bosqich 2025-yil 1-yanvardan 500 milliard so‘mni tashkil etishi lozimligi belgilangan.
Iqtisodchi Otabek Bakirov qator banklar hozirda bu talablarga javob bermasligiga eʼtibor qaratdi.
“1-may holatiga kamida 8 ta bank yana uch oydan keyin kuchga kiradigan talablarga javob bermaydi. Shulardan ‘Poytaxtbank’, ‘Ravnaq bank’, ‘Madad invest bank’ va ‘O‘zagroeksportbank’ kecha tashkil bo‘lgan emas, eski banklar”, — deb yozdi u.
Markaziy bankka ko‘ra, qonun loyihasi ishlab chiqilayotgan vaqtda, tijorat banklariga ustav kapitalini belgilangan miqdorga yetkazish bo‘yicha aniq choralarni belgilash va uning ijrosini taʼminlash yuzasidan tegishli ko‘rsatmalar berilgan.
“Ustav kapitali miqdori belgilangan minimal talablarga javob bermaydigan banklarga nisbatan qonun hujjatlariga asosan boshqa banklarga qo‘shilish tavsiya etiladi, aks holda ulardan bank faoliyatini amalga oshirish huquqini beruvchi litsenziyasi chaqirib olinadi”, — deyiladi munosabatda.
O‘zbekistonda banklarning ustav kapitalining eng kam miqdorini oshirish taklifligi 2022-yil oktabrda muhokamaga qo‘yilgan edi. Senat bu boradagi qonunga o‘zgartirish kiritishni 2023-yil aprel boshlarida ma’qullagan. Aprel oxirida esa prezident tomonidan imzolangan qonun bilan “Banklar va bank faoliyati to‘g‘risida”gi qonunga o‘zgartish kiritilgan.
Izoh (0)