O‘tgan yili dunyo bo‘ylab millionerlar soni sezilarli darajada kamaydi. Fransiyaning Capgemini konsalting firmasi 1-iyun kuni ma’lum qilishicha, 2022-yilda 21,7 millionga yaqin kishida, ko‘chmas mulkni hisobga olmaganda, 1 million dollardan ko‘proq mablag‘ bo‘lgan — bu avvalgi yilga nisbatan 3,3 foizga kam. Shunday qilib 2022-yilda dunyoning eng badavlat kishilari umumiy boyligi 3,6 foizga kamayib, 83 trillion dollarni tashkil qildi.
“Bu makroiqtisodiy va geosiyosiy noaniqlik tufayli o‘n yil ichidagi eng katta qisqarish”, — deyiladi Capgemini hisobotida. Kompaniyaning moliyaviy ekspertlari 71 ta davlatdagi mulk holatini tahlil qilgan.
Kompaniya ma’lumotlariga ko‘ra, eng ko‘p Shimoliy Amerikadagi mulk kamaygan — 7,4 foizga. Yevropada boylikning kamayishi 3,2 foiz, Osiyo va Tinch okeanida esa 2,7 foiz darajasida qayd etilgan. Shu bilan birga, Afrika, Lotin Amerikasi va Yaqin Sharqdagi mulk, aksincha, Rossiyaning Ukrainaga qarshi urushi fonida, avvalo, neft va gaz narxining ko‘tarilishi tufayli ortgan.
Capgemini moliyaviy tadqiqotlar bo‘limi rahbari Elias Ganem millionerlar sonining qisqarishi va fond bozorlaridagi vaziyat o‘rtasida bevosita bog‘liqlikni ko‘rmoqda AQSHning NASDAQ indeksi o‘tgan yili 33 foiz, Fransiyaning CAC’si 40 9,5 foiz va Germaniya DAX indeksi 12 foiz yo‘qotgan.
Eslatib o‘tamiz, Tesla va SpaceX asoschisi Ilon Mask Bloomberg talqini bo‘yicha hozir dunyoning eng boy odamlari ro‘yxatida yana birinchi o‘rinni egallab turibdi. Bloomberg Billionaires Index ma’lumotlariga ko‘ra, tadbirkorning boyligi 192 milliard dollarni tashkil etadi. LVMH guruhi egasi Bernard Arno esa 187 milliard dollar boyligi bilan ikkinchi o‘ringa tushib qoldi.
Izoh (0)