AQSH Kongressining Vakillar palatasi davlat qarzining chegarasi bo‘yicha qonun loyihasini ma’qulladi. Reuters xabariga ko‘ra, bunday qaror mamlakatga defolt va moliyaviy inqirozdan qochish imkonini beradi. Hujjatni 314 nafar kongressmen qo‘llab-quvvatladi, 117 nafari qarshi ovoz berdi.
2023-yilning yanvar oyida Qo‘shma Shtatlar 31,4 trillion dollarlik qarz chegarasiga yetgan edi. Qabul qilingan qonun loyihasida qarz chegarasini muayyan darajaga oshirish aytilmagan, balki ushbu chegara muddati avval belgilanganidek 2025-yilning yanvarigacha bo‘lishi bekor qilingan.
Endi qonun loyihasi AQSH Senati tomonidan ma’qullanishi kerak, shundan so‘ng uni prezident imzolaydi.
Jo Bayden erishilgan kelishuvni “Amerika xalqi va iqtisodiyoti uchun yaxshi xabar” deb atadi. “Senatdan uni imkon qadar tezroq qabul qilishini so‘rayman, shunda men ham uni tezroq imzolashim mumkin bo‘ladi”, — deya qo‘shimcha qildi AQSH prezidenti.
Avvalroq AQSH moliya vaziri Janet Yellen g‘aznada hukumat majburiyatlarini bajarishga ajratilgan mablag‘ 5-iyungacha tugatishi, shundan so‘ng defolt yuzaga kelishi haqida ogohlantirgan edi. May oxirlarida Bayden va Vakillar palatasi spikeri Kevin Makkarti uzoq bahslardan so‘ng mamlakatning davlat qarzi chegarasini oshirish bo‘yicha yakuniy kelishuvga erishdi.
Izoh (0)