Xorazm viloyati Xonqa tumanida dars payti 3-sinf qizlariga shahvoniy shilqimlik qilgan 61 yoshli o‘qituvchi 5 sutkaga qamalgandi. “Nemolchi.uz” loyihasida uning qilmishi noto‘g‘ri malakalangani va jinoyat ishi qo‘zg‘atilishi kerakligi aytilgach, Xorazm viloyati sudlari bunga munosabat bildirdi.

Unda aytilishicha, ish holatiga ko‘ra, huquqbuzar B.R. voyaga yetmagan 3-sinf o‘quvchilari S.K. va M.E.ga nisbatan dars paytida shahvoniy shilqimlikda ifodalanuvchi ma’muriy huqubuzarlikni sodir etganlikda aybdor deb topilgan.

Ma’muriy javobgarlik to‘g‘risidagi kodeksga 11-aprelda kiritilgan yangi 41-1-modda 1-qismida, shahvoniy shilqimlik qilish, ya’ni shaxsga nisbatan uning uchun nomaqbul bo‘lgan hamda uning sha’ni va qadr-qimmatini tahqirlaydigan, shaxsning tashqi qiyofasini yoki qaddi-qomatini tavsiflashda, imo-ishora qilishda, teginishda, chaqirishda ifodalangan, shahvoniy xususiyatga ega bo‘lgan harakatlarni bir marta qo‘pol ravishda yoki bir necha marta sodir etganlik uchun javobgarlik belgilangan bo‘lib, mazkur huquqbuzarlik sanksiyasida bazaviy hisoblash miqdorining 2 baravaridan 5 baravarigacha miqdorda jarima yoki 5 sutkagacha muddatga ma’muriy qamoq jazosi nazarda tutilgan.

Jinoyat ishlari bo‘yicha Xonqa tuman sudi tomonidan huquqbuzar B.R.ga mazkur modda sanksiyasida nazarda tutilgan maksimal jazo, ya’ni 5 sutka ma’muriy qamoq jazosi tayinlangan.

Mamuriy javobgarlik to‘g‘risidagi kodeksning 324-1moddasiga muvofiq, ma’muriy huquqbuzarlik to‘g‘risidagi ish yuzasidan taraflarga sud qarorlaridan norozi bo‘lgan taqdirda qonunda belgilangan tartibda Xorazm viloyat sudining jinoyat ishlari bo‘yicha sudlov hay’atiga appelyatsiya shikoyati (protesti) keltirishlari mumkinligi tushuntirilgan.