Xitoyning Xunan provinsiyasida to‘rt yoshli bola ochiq soyabon bilan 26-qavatdan sakradi, deb xabar bermoqda Mothership nashri.
Nashrning yozishicha, bolakay “Tom va Jerri” multfilmidagi sahnadan ilhomlangan. U o‘ylab ham o‘tirmasdan o‘sha sahnani takrorlashga qaror qilgan. Bola 26-qavatda joylashgan xonadonning balkoniga chiqib, pastga sakragan. Bu vaqtda u uyda yolg‘iz bo‘lgan. Ota-onasi ishda, unga qarayotgan buvisi esa singlisini olib kelish uchun uydan chiqqan edi.
Voqea joyiga yetib kelgan shifokorlar bolada sinish jarohatlari ko‘pligini, biroq uning hayoti xavf ostida emasligini aytishdi. Mo‘jizaga oddiygina izoh berildi: bolaning vazni juda kichik, u avval daraxtga urilib, yerga yumshoqroq yiqilgan.
Aprel oyida Qozog‘istonning Jetisu viloyatida sakkiz yoshli bola polietilen paketni ko‘tarib, beshinchi qavat derazasidan sakragan edi. Daraxt shoxlari sabab bola yerga yumshoqroq tushgan.
Rossiyaning Saxalin viloyatida esa ona va o‘g‘il yong‘indan qochib to‘rtinchi qavatdan sakragan edi. Ularning ikkisi ham omon qolgan.
Izoh (0)