Tashkent City’dagi Congress Hall majmuasida Tadbirkorlar va ishbilarmonlar harakati — O‘zbekiston Liberal-demokratik partiyasining o‘n birinchi syezdi boshlangani to‘g‘risida xabar berilgandi. O‘zbekiston prezidentligiga nomzod Shavkat Mirziyoyev o‘z saylovoldi dasturida 5 ta eng asosiy yo‘nalishga eʼtibor qaratishini taʼkidladi.
1-maqsad: Ta'lim yo‘nalishi
Dunyodagi Top-500 ga kiradigan chet el oliygohlari bilan hamkorlikda kamida 50 ta qo‘shma o‘quv dasturi va “ikki diplomli tizim” joriy etiladi. Bundan tashqari, bio-texnologiya, sunʼiy intellekt va boshqa yuqori texnologik yo‘nalishlarda yiliga 500 nafar isteʼdodli yoshlar eng nufuzli xorijiy oliygohlarga davlat hisobidan o‘qishga yuboriladi.
Buning uchun, 200 million dollar yo‘naltiriladi. Kelgusi yetti yilda ilm-fan va innovatsiyalarni rivojlantirish uchun 1 milliard dollar ajratiladi.
“Biz hurmatli professor va akademiklar, ilmiy tadqiqotlar olib borayotgan magistr va aspirantlar, oliygohlar o‘qituvchi va domlalari, bir so‘z bilan aytganda, zahmatkash ilmiy va ijodkor ziyolilarimiz vatan ravnaqiga munosib hissa qo‘shayotganini yuksak qadrlaymiz. Fursatdan foydalanib, ularning barchasiga minnatdorchilik bildirib, samimiy hurmat-ehtiromim va ezgu tilaklarimni izhor etaman”, — deydi Shavkat Mirziyoyev.
Shuningdek, davlat rahbari bundan olti-yetti yil oldin, afsuski, o‘n minglab bemorlar gemodializ, onko-gematologiya yordamidan foydalanish uchun kunlab, oylab navbat kutganlari, qanchasi bu xizmatlarga yetib bora olmaganini eslab o‘tdi.
“Biz tibbiyot sohasida katta islohotlarni boshladik. Buning natijasida vaziyat tubdan o‘zgardi. Endi bunday bemorlar uchun zamonaviy shifoxonalar ham, malakali mutaxassislar va davolash uchun mablag‘imiz ham yetarli. Lekin aholimizni tibbiyot tizimidan rozi qilish uchun, hali juda ko‘p ishlarni amalga oshirishimiz kerak”, — deydi prezident.
Ta’kidlanishicha, O‘zbekistonda o‘rtacha umr davomiyligini hozirgi 73 yoshdan kelgusida 78 yoshga yetkazish bo‘yicha barcha imkoniyatlar ishga solinadi.
Buning uchun, 2030-yilga qadar:
- onalar va bolalar o‘limi, bolalar o‘rtasida irsiy kasalliklar kamida 2 barobarga qisqartiriladi;
- onkologiya, yurak-qon tomir, diabet, nafas yo‘llari va yuqumli kasalliklar bo‘yicha erta o‘limni esa 2,5 barobar kamaytirish asosiy vazifa bo‘ladi.
Bunda:
- 120 ming nafar onkologiya, 350 ming nafar diabet, 1,5 million yurak-qon tomir kasalligi bor bemorlarni davolash bilan to‘liq qamrab olinadi;
- Gepatit C kasalligini 100 foiz davlat hisobidan davolashni yo‘lga qo‘yiladi;
- tuberkulyoz bilan kasallanish darajasini yuz ming aholiga nisbatan hozirgi 34 nafardan keskin kamaytirishga erishamiz (2016-yilda 43 nafar bo‘lgan).
Shu bilan birga, kelgusi yildan birlamchi bo‘g‘in orqali eng ko‘p uchraydigan 10 ta kasallikni davolash va 6 ta tibbiy xizmatdan iborat kafolatlangan tibbiy paket aholiga bepul taqdim etiladi. Bu orqali, tibbiy yordamga muhtoj aholining 70 foiz murojaatlari birlamchi bo‘g‘inning o‘zida hal bo‘ladi.
Shuningdek, onkologik bemorlar hayotini saqlab qolish maqsadida, O‘zbekistonda ilk bor o‘zak hujayralari transplantatsiyasi yo‘lga qo‘yiladi. Bu boradagi xarajatlar ehtiyojmand oilalar farzandlari uchun to‘liq davlat hisobidan qoplanadi.
Tug‘ish yoshidagi va homilador ayollar, bolalarga 7 turdagi vitaminlar, yod va foliy kislotasini bepul tarqatish kelgusi yillarda ham davom ettiriladi.
Yana bir muhim yangilik — sog‘liqni saqlash tizimi to‘liq raqamlashtiriladi va tibbiy sug‘urta tizimi joriy qilinadi. Umuman, 2030-yilga qadar tibbiyotga budjetdan ajratiladigan yillik mablag‘ hajmini 2 karra oshirib, 6 milliard dollarga yetkaziladi.
2-maqsad: Barqaror iqtisodiy o‘sishni ta’minlash
2030 yilga borib:
- iqtisodiyot 2 barobarga oshirilib, 160 milliard dollarga yetkaziladi;
- aholi jon boshiga yalpi ichki mahsulot hajmi hozirgi 2 ming 200 dollardan 4 ming dollarga oshiriladi. Buning natijasida, O‘zbekiston «daromadi o‘rtachadan yuqori bo‘lgan davlatlar» qatoriga kiradi. Eng avvalo, ilg‘or texnologiyalarga asoslangan sanoat rivojlantiriladi. Bunda, mehnat unumdorligi 2 barobar oshadi (hozir bir ishchiga 12,5 ming dollar mahsulot to‘g‘ri keladi).
Ikkinchi maqsad doirasida, shuningdek, xorijiy hamkorlar bilan birga, umumiy qiymati 115 milliard dollar bo‘lgan yirik loyihalar boshlandi. Jumladan, keyingi yillarda strategik mega-loyihalar ishga tushiriladi. Xususan:
✔️ Olmaliqda 3 ta mis boyitish fabrikasi va yangi mis eritish zavodi;
✔️ Ohangaron misni qayta ishlash klasteri;
✔️ Navoiy, Qo‘ng‘irot va Qorako‘lda yirik kimyo-polimer klasterlari;
✔️ Toshkent va Navoiy viloyatlarida fosforit xom ashyosidan yuqori qo‘shilgan qiymatli tayyor mahsulot ishlab chiqarish korxonasi;
✔️ Tebinbuloq va G‘allaorolda temir ishlab chiqarish majmualari ish boshlaydi.
Natijada, 2030 yilgacha yuqori daromadli mahsulot uchun zarur bo‘lgan mis ishlab chiqarish — 3,5 barobar (500 ming tonnaga), oltin — 1,5 karra (155 tonna), kumush — 3 marta (500 tonna), uran — 3 barobar (10 ming tonna) oshiriladi. Mamlakatimiz tarixida ilk bor alyuminiy, litiy, po‘lat, grafit ishlab chiqarish boshlanadi.
3-maqsad: Suv resurslarini tejash va atrof muhitni muhofaza qilish
2030-yilga qadar ekin maydonlarini to‘liq suv tejaydigan texnologiyalarga o‘tkazish uchun dalalarga suv yetkazadigan obektlar fermer va klasterlar boshqaruviga beriladi.
Suv yetkazish tizimiga Turkiya, Ispaniya, Xitoy kabi davlatlar tajribasi keng joriy qilinadi.
Suv tejaydigan texnologiyani joriy qilgan fermer va dehqonlarni yanada rag‘batlantiriladi.
4-maqsad: Qonun ustuvorligini ta’minlash, xalq xizmatidagi davlat boshqaruvini tashkil etish
Raqamlashtirish orqali byurokratiyani bartaraf etish prinsipi hayotga jadal olib kiriladi. Shu maqsadda davlat xizmatlari to‘liq elektron shaklga o‘tkaziladi.
Endi, davlat xizmatlari uchun odamlar ovora bo‘lib, ariza yoki blanka to‘ldirmaydi, pasport yoki boshqa hujjat taqdim qilmaydi. Davlat idoralari zarur hujjatlarni elektron tizimdan o‘zi oladi.
Har bir mahallada elektron xizmat nuqtalari ishga tushirilib, ular barcha masalalarni «bir qadam»da hal etadigan maskanga aylantiriladi.
5-maqsad: Qurolli Kuchlarimizning harbiy salohiyatini yanada oshirish
“Yangi O‘zbekiston xavfsiz va tinchliksevar davlat”. Ushbu yo‘nalishda Markaziy Osiyoda turli yo‘nalishlar, ayniqsa, suv resurslaridan oqilona foydalanish, transport yo‘laklarini rivojlantirish borasidagi amaliy hamkorlik sifat jihatidan yangi bosqichga olib chiqish, xorijdagi vatandoshlarni qo‘llab-quvvatlab, yurtimiz taraqqiyotida faol ishtirok etishlari uchun ularga zarur shart-sharoitlarni yaratib berish bo‘yicha tizimli choralarni ko‘rish taklif etilmoqda.
Dasturda Qurolli Kuchlarimizning qudrati, mudofaa qobiliyati va harbiy salohiyatini yanada oshirish maqsadida Milliy armiyani 2030 yilga qadar eng zamonaviy qurol-aslaha va harbiy texnika bilan ta’minlash bo‘yicha tashabbuslar ilgari surilmoqda.
Syezd qaroriga ko‘ra O‘zLiDeP qonunda belgilangan tartibda O‘zbekiston Respublikasi Prezidentligiga partiya nomzodini ro‘yxatga olishni so‘rab O‘zbekiston Respublikasi Markaziy saylov komissiyasiga murojaat etadi.
Izoh (0)