O‘zbekiston tomoni Qirg‘iziston bilan chegaradagi devorni buzib tashladi. Holat tasvirlangan videolar ijtimoiy tarmoqlarda tarqaldi. Kaktus.media’ning yozishicha, tasvirlar Qirg‘izistonning Jalolobod viloyati va O‘zbekistonning Andijon viloyati chegarasida suratga olingan.
Qirg‘iziston chegara xizmatiga ko‘ra, O‘zbekiston tomoni 2010-yilda bir tomonlama berkitilgan “Bekobod—Xonobod” o‘tkazish punktlari devorlarini buzib tashlayapti. O‘shanda O‘sh viloyatiga o‘tuvchi “Qorasuv” va “Qorabag‘ich” o‘tkazish punktlari ham berkitilgan edi.
Ta’kidlanishicha, mazkur chegara nazorat o‘tkazish punktlarining barchasi yaqin orada ochiladi. Qirg‘iziston tomoni ham bu punktlar orqali fuqarolarning o‘tib-qaytishini qayta boshlashga to‘liq tayyor.
2022-yil 17-may kuni O‘zbekiston va Qirg‘iziston maxsus xizmatlari rahbarlari vertolyotda qirg‘iz—o‘zbek chegarasining belgilanmagan qismini ko‘zdan kechirgandi.
O‘zbekiston va Qirg‘iziston rasmiylarining ikki mamlakat chegarasini demarkatsiya qilishning tashkiliy-huquqiy masalalari bo‘yicha 4–8-iyul kunlari Andijonda bo‘lib o‘tgan navbatdagi maslahatlashuvda tomonlar davlat chegaralari demarkatsiyasi jarayonini tartibga soluvchi normativ-huquqiy va texnik hujjat loyihalarini ishlab chiqqan. Ikki mamlakat chegara bo‘yicha barcha masalalarni 2022-yil oxirigacha yakunlashi kutilayotgan edi.
Izoh (0)