Litva Yadro energetikasi xavfsizligi bo‘yicha davlat inspeksiyasi Belarus Favqulodda vaziyatlar vazirligiga Ostrovets shahridagi Belarus atom elektr stansiyasining 1 va 2-energobloklari ishini to‘xtatish talabi bilan xat yuborganini ma’lum qildi.
Xatda barcha yadroviy xavfsizlik masalalari hal etilmaguncha elektrostansiyani ishlatmaslik so‘ralgan.
“Yadro xavfsizligini taʼminlash bo‘yicha ko‘plab masalalar haligacha hal etilmagan. Litva Yadro energetikasi xavfsizligi bo‘yicha davlat inspeksiyasi haligacha ulardan AES uchun tanlangan joy bilan bog‘liq xavfsizlik savollariga javob kutayotganini eslatdi. Shuningdek, Belarus AESning seysmik hodisalarga chidamliligi, ehtimoliy aviahalokat oqibatlari qanday bo‘lishi, stress-testlar bo‘yicha tavsiyalarga rioya qilish, xavfsizlik, yong‘in xavfini baholash va boshqa masalalar bo‘yicha savollar ochiq turibdi”, — deyiladi inspeksiya bayonotida.
Ta’kidlanishicha, Litva idorasi Belarus hukumatidan stansiyaning 2-energoblok reaktorining sovitish sxemasi organik moddalar bilan, 1-energoblokning ikkilamchi aylanish sxemasi esa radionuklidlar bilan ifloslangani haqidagi ma’lumotga aniqlik kiritishni so‘ramoqda. Inspeksiya, shuningdek, reaktor korpusidagi kamchiliklar, aniqlangan nuqsonlar va tugallanmagan ishlar bo‘yicha tushuntirishlar talab qilmoqda.
Xat nusxalari Xalqaro atom energiyasi agentligi (MAGATE), Yevropa komissiyasi, Yevropa yadroviy xavfsizlikni tartibga solish guruhi (ENSREG) va G‘arbiy Yevropa yadroviy tartibga soluvchilar uyushmasiga (WENRA) yuborilgan.
Belarusda elektr energiyasini bosqichma-bosqich ishga tushirish dasturiga muvofiq 13-may kuni Belarus AESning ikkinchi energetika bloki (Ostrovetsda) ilk bor elektr tarmog‘iga ulandi — u mamlakatning yagona energetika tizimiga birinchi kilovatt-soat elektr energiyasini yetkazib berdi.
Izoh (0)