Buxoroda soxta soliq inspeksiyasi xodimi bir mln so‘m bilan qo‘lga tushdi

Buxoro viloyati Kogon shahrida soxta soliq inspeksiyasi xodimi bir mln so‘m bilan qo‘lga tushdi. Bu haqda viloyat IIB axborot xizmati xabar berdi. 

Unga ko‘ra, holat Buxoro viloyati huquq tartibot organlari tomonidan o‘tkazilgan tezkor tadbir davomida aniqlangan. Vobkent tumani “Charmgaron” mahallasida yashovchi, 2000-yilda tug‘ilgan B.S. “Sabina Samira chorvasi” oilaviy korxonasi rahbari T.A.ni aldab, unga o‘zini Kogon shahar DSI xodimi deya tanishtirgan. 

U korxonaga tegishli savdo do‘koni sotuvchisi tomonidan xarid cheki berilmagani haqida soliq idorasiga murojaat tushganini aytgan. Ushbu murojaatni ijobiy hal qilib berish evaziga bir million so‘m talab qilib, 26-may kuni Kogon shahar DSI binosi yonida T.A.dan talab qilingan pullarni olayotgan vaqtda daliliy ashyolar bilan jinoyat ustida ushlangan.

Mazkur holat yuzasidan fuqaro B.S.ga nisbatan Jinoyat kodeksining 168-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.