Namanganda “Farg‘ona vodiysida turizm: yangi Axsikent turizm markazini yaratish” mavzusidagi xalqaro ilmiy-amaliy konferensiya bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Anjumanda ishtirok etgan Namangan viloyati hokimi Shavkat Abdurazzoqov ushbu anjuman 62-xalqaro gullar festivali doirasida o‘tkazilayotgani bejiz emasligini taʼkidladi.
“Turizmni viloyat iqtisodiyotining asosiy drayverlaridan biri sifatida ko‘rmoqdamiz. Boburga beshik bo‘lgan Axsikent esa bu borada alohida o‘rin tutadi. Ayni paytda bu yerda turizm klasterini tashkil etish konsepsiyasi ishlab chiqilmoqda. Ushbu rejaga asosan Axsikent hududida Markaziy Osiyodagi eng katta muzeylardan biri tashkil etiladi. Axsikentning qadimiy dovrug‘ini tiklash maqsadida ramziy darvoza quriladi, Umarshayx Mirzo va Bobur haykallari tiklanadi. Sayyohlar uchun Sirdaryo bo‘ylab qayiqlarda sayr qilish, ot va tuyalarda ko‘hna shaharni tomosha qilish imkoniyati yaratiladi”, — dedi Namangan viloyati hokimi.
Shavkat Abdurazzoqovga ko‘ra, turizm shaharchasi kelgusida mehmonxona, karvonsaroy, restoran va milliy hunarmandchilik rastalarini o‘z ichiga oladi.
Anjumanda so‘z olganlar turizm rivojida Axsikent kabi arxeologik yodgorliklarning o‘rni va ahamiyati haqida maʼruza qildi. Anjuman yakunida, shuningdek, mehmonlar Axsikent ochiq osmon ostidagi muzeyi va “Axsi sayyidlari” ilmiy-maʼrifiy majmuasi bilan tanishdi.
Izoh (0)