Xitoyning Shansi provinsiyasi Yanlin shahrida SHHTga aʼzo, kuzatuvchi va hamkor mamlakat vakillarining kambag‘allikni qisqartirish, farovon hayot bilan taʼminlash masalalariga bag‘ishlangan forumi ish boshladi, deb xabar beradi O‘zA.

Ma’lum qilinishicha, forum ishtirokchilari dastlab Xitoy tajribasi mahsuli — kambag‘allikdan chiqarilgan aholi turmush tarzi, mehnat faoliyatini aks ettiruvchi ko‘rgazma bilan tanishgan. So‘ngra forumning ochilishi hamda yalpi yig‘ilishi bo‘lib o‘tgan. Unda nafaqat SHHT maydonidagi, balki Osiyo, Afrikadagi Xitoy tajribasiga qiziqqan davlatlar vakillari ishtirok etgan.  

Forum ishida O‘zbekiston bosh vazirining o‘rinbosari Jamshid Qo‘chqorov boshchiligidagi delegatsiya ham qatnashmoqda. 

Yalpi yig‘ilishda so‘zga chiqqan Jamshid Qo‘chqorov forum ahamiyatini taʼkidlab o‘tdi. U o‘z chiqishida mamlakatda bir-biri bilan uzviy bog‘liq islohotlar natijasida 2022-yilning o‘zida 1 million odam kambag‘allikdan chiqarilganini aytdi. Jamshid Qo‘chqorov yalpi majlisda O‘zbekiston tomonining amaliy takliflarini ham aytib o‘tgan.

“Kambag‘allikni qisqartirish tajribasi Xitoyda orttirilgan va bugun barcha mamlakatlarga taklif etilayotgan bo‘lsa-da, har bir davlat uni boyitib boryapti. Masalan, O‘zbekistonda qishloq aholisi turmush sharoitini yaxshilash, infratuzilma yaratish, taʼlim, sog‘liqni saqlash sohalarini rivojlantirish, kichik biznes yuritish imkoniyatlarini kengaytirishga alohida eʼtibor berilmoqda. Hatto har bir mahallada hokim yordamchisi instituti tashkil etildi. Shuning uchun ham SHHT qoshida kambag‘allikni qisqartirish tajribasini tahlil va targ‘ib qiluvchi doimiy faoliyat ko‘rsatadigan qo‘mita tuzishni taklif etaman”, — deydi Jamshid Qo‘chqorov.  

May o‘rtalarida O‘zbekistonda 2023-yil birinchi choragida 210 ming aholi kambag‘allikdan chiqarilgani to‘g‘risida xabar berilgandi.