Sharqiy Yevropa va Markaziy Osiyo davlatlari bo‘yicha Chexiya savdo-sanoat palatasida O‘zbekiston Farmatsevtika tarmog‘ini rivojlantirish agentligi hamda Dr Muller Pharma kompaniyasi vakillari o‘rtasida muzokaralar o‘tkazildi. Bu haqda “Dunyo” agentligi xabar berdi.
Dr. Muller Pharma dori vositalari, tibbiyot tovarlari, biologik aktiv qo‘shimchalar va kosmetika ishlab chiqarishga ixtisoslashgan. Yevropa, Afrika va Osiyoning 40 dan ortiq davlatlariga o‘z mahsulotlarini eksport qilib keladi.
Kompaniya vakillari Andrea Verish va Irina Filipi muzokaralar davomida O‘zbekistondagi kichik biznes va xususiy tadbirkorlik rivojini, jumladan, farmatsevtika sohasini rivojlantirish borasida amalga oshirilayotgan islohotlarni yuqori baholadi hamda farmatsevtika sanoatida qo‘shma loyihalarni amalga oshirishdan manfaatdorlikni qayd etdi.
Muzokaralar yakunlari bo‘yicha Chexiya tomoni O‘zbekiston Farmatsevtika sanoatini rivojlantirish agentligi bilan yaqin va uzoq muddatli hamkorlikni yo‘lga qo‘yishga, xususan, dori-darmon va kosmetika mahsulotlarini tayyorlash uchun xomashyo yetkazib berishga tayyorligini bildirgan.
May boshlarida O‘zbekiston dorixonalarida sotilgan dori vositalari va tibbiy buyumlar uchun belgilangan ustamalardan yuqori mablag‘ olingani aniqlansa, ortiqcha pulni isteʼmolchiga qaytarish tizimi ishga tushirilayotgani to‘g‘risida xabar berilgandi.
Izoh (0)