Xitoyda ishlab chiqarilgan yangi C919 katta sig‘imli yo‘lovchi samolyoti birinchi tijoriy parvozini muvaffaqiyatli yakunladi. Samolyot Shanxaydan Pekinga bordi, deb xabar bermoqda BBC.
Samolyot Xitoy tijoriy aviatsiya korporatsiyasi (Comac) tomonidan ishlab chiqarilgan. U Airbus va Boeing samolyotlarining bozordagi dominantligiga barham berish umidida ishlab chiqilgan (Rossiyaning Sukhoi Superjet 100 samolyoti ham shunga da’vo qilmoqda).
Biroq Xitoyning 164 o‘rinli ushbu samolyoti G‘arb komponentlariga, jumladan dvigatellari va avionikasiga (bortdagi parvoz va navigatsiya elektron tizimlari to‘plami) deyarli butunlay qaram.
Shanxaydan Pekinga parvoz uch soatdan kamroq vaqt oldi. Samolyot bortida 130 nafar yo‘lovchi bo‘lgan.
“Mamlakatimiz imkoniyatlariga mutlaq ishonaman”, — dedi reys yo‘lovchilaridan biri Lyu Pen Reuters agentligiga. “C919 hali yanada yaxshilanadi”.
Davlat tomonidan qo‘llab-quvvatlanadigan China Eastern Airline bugunga qadar shunday samolyotlardan beshtasiga buyurtma bergan. Comac birinchi besh yilda yiliga 150 ta samolyot ishlab chiqarishni rejalashtirmoqda. Shuningdek, u hozirgacha C919 uchun 1 200 dan ortiq buyurtma olganini da’vo qilmoqda. Biroq ayrim ekspertlarning fikricha, bu buyurtmalarning aksariyati chinakam emas, balki Xitoy aviatashuvchilarining qiziqish bildirishidir.
Bir necha yil oldin C919 samolyoti kabinasiga chiqib ko‘rgan Xitoy raisi Si Szinpin loyihani Xitoyning eng innovatsion yutuqlaridan biri deb atagandi. C919 2017-yilda ilk sinov parvozini amalga oshirgan va o‘shandan beri yana bir nechta sinovlar o‘tkazgan.
U Xitoyning birinchi reaktiv samolyoti — ARJ21 dan ancha uzoqroq masofaga ucha oladi va ko‘proq yo‘lovchilarni tashiydi.
Izoh (0)