AQSH prezidenti Jo Bayden va Vakillar palatasi spikeri Kevin Makkarti mamlakatning davlat qarzi chegarasini oshirish bo‘yicha yakuniy kelishuvga erishdi. Bu haqda har ikki siyosatchi 29-mayga o‘tar kechasi ma’lum qildi. Reuters xabariga ko‘ra, tegishli hujjat 2025-yilning 1-yanvariga qadar davlat qarzining yuqori chegarasini oshirishni nazarda tutadi, u esa hozirda qariyb 31,4 trillion dollarni tashkil etadi.
AQSH rahbarining so‘zlariga ko‘ra, 99 sahifalik yakuniy hujjatda uning “ustuvor yo‘nalishlari va yutuqlari” inobatga olinadi, faxriylar, keksalar va kam ta’minlangan oilalarni qo‘llab-quvvatlashni qisqartirish bo‘yicha talablar rad etiladi, shuningdek, Bayden va AQSH vitse-prezidenti Kamala Xarris tomonidan ilgari surilgan “talabalik krediti” qarzini yengillashtirish tashabbusi qo‘llab-quvvatlanadi.
“Bu kelishuv Amerika xalqi uchun yaxshi yangilik”, — dedi Oq uy rahbari butun dam olish kunlari davom etgan muzokaralardan so‘ng.
Makkartining aytishicha, AQSH budjetidagi xarajatlar baribir qisqaradi — umumiy ma’noda ham, milliy mudofaa bilan bog‘liq bo‘lmagan sohalarda ham. Makkartining ta’kidlashicha, so‘nggi marta davlat qarzining yuqori chegarasi bir necha marta oshirilganda, tomonlar budjet taqchilligini kamaytirishga kelishib olgandi. Bundan tashqari, hujjat kam daromadli amerikaliklarga oziq-ovqat yordami dasturlari uchun yangi talablarni belgilaydi — xususan, ular uchun qo‘shimcha ish talablari paydo bo‘ladi.
Makkarti va Bayden hujjat bir ovozdan qabul qilinishini kutmayapti
Kelishuv kuchga kirishi uchun hujjat AQSH Kongressining ikkala palatasi tomonidan ma’qullanishi kerak — bu 5-iyungacha, mamlakat Moliya vazirligi investorlar oldidagi majburiyatlarini bajarish uchun pul yetishmasligi haqida e’lon qilishi kutilayotgan sanagacha amalga oshishi kerak. Shu bilan birga, vakillar palatasida qarz potologini oshirish bo‘yicha bahslar bo‘lib o‘tmoqda. Moliya vaziri Janet Yellen bu chorani yanvar oyidayoq tavsiya qilgan edi.
Hujjatning qabul qilinishiga murosasiz respublikachilarning bir qismi ham, ayrim ilg‘or demokratlar ham qarshi. Biroq Senatdagi Respublikachilar yetakchisi Mitch Makkonnell kelishuvni olqishladi va uni ortiqcha kechiktirmasdan qabul qilishga chaqirdi. Makkarti, shuningdek, Vakillar palatasida respublikachilarning 95 foizdan ortig‘i kelishuvga ijobiy munosabatda, deb hisoblaydi.