Xorazm viloyati Xonqa tumanida dars payti 3-sinf qizlariga behayo xatti-harakatlar qilgan 61 yoshli o‘qituvchi 5 sutkaga qamaldi. Bu haqda “Nemolchi.uz” loyihasi xabar berdi.

Ma’lum qilinishicha, 4-may kuni Xonqa tumanidagi maktablardan birida rus tili o‘qituvchisi bo‘lgan 1962-yilda tug‘ilgan erkak B.R. dars payti 3-sinfda o‘qiydigan ikki nafar qizning orqasi, yelkalari, qo‘llari, qornini ushlab, yubkasini ostiga qo‘lini tiqib silagan.

Qizlar bu haqda ota-onalariga aytgan, ular o‘z navbatida huquqni muhofaza qiluvchi organlarga murojaat qilgan. O‘qituvchiga nisbatan Ma’muriy javobgarlik to‘g‘risidagi kodeksning 41-1-moddasi (shahvoniy shilqimlik qilish) bilan ish ochilgan. 25-may kuni ayblanuvchiga nisbatan 5 sutka ma’muriy qamoq jazosi tayinlangan.

“Nemolchi.uz” loyihasining qayd etishicha, o‘qituvchining qilmishi noto‘g‘ri malakalangan va unga nisbatan Jinoyat kodeksining 129-moddasi bilan jinoyat ishi qo‘zg‘atilishi kerak edi. Sudlanuvchi qizlarga nisbatan uyatsiz harakatlar qilganini tan olmagan va aksincha, ular yaxshi o‘qigani uchun yelkalariga qoqib qo‘yganini aytgan. Lekin to‘plangan ma’lumotlar qizlarning gapini tasdiqladi.

“Ya’ni tergov va sud pedagog kichik yoshdagi qizlarning intim a’zolarini ushlaganini bildi va buni og‘irlashtiruvchi holat deb topmadimi?  Bunday jinoyatlar Jinoyat kodeksining 129-moddasi (16 yoshga to‘lmagan shaxsga nisbatan uyatsiz-buzuq harakatlar qilish) 2-qismi “b”, “v” va “j” bandlari bilan kvalifikatsiya qilinishi lozim.

Buning uchun jazo esa 3 yildan 5 yilgacha ozodlikni cheklash yoki o‘qituvchilik faoliyati bilan shug‘ullanishni taqiqlagan holda 3 yildan 5 yilgacha ozodlikdan mahrum qilishni nazarda tutishi kerak. Ma’muriy javobgarlik to‘g‘risidagi kodeksning 41-1-moddasi bo‘yicha maksimal jazo 10 sutka ma’muriy qamoq jazosini nazarda tutadi va u bolalar bilan ishlashda davom etishi mumkin”, — deyiladi xabarda.

“Nemolchi.uz” loyihasi ish qayta kvalifikatsiya qilinishini, aybdor shaxs qilmishi uchun to‘liq jazolanishini talab qilgan.