Ijtimoiy tarmoqlarda Buxoroda qurilishi boshlanayotgan atrofi o‘rab olingan maydonda daraxtlar kesib tashlangani aks etgan rasm tarqaldi. Tabiat resurslari vazirligi Buxoro viloyati boshqarmasi tomonidan holat yuzasidan o‘rganish ishlari olib borildi.
O‘rganish davomida "Pridastgir" jome masjidi hududida tahoratxona qurilishi ishlari olib borilayotgani tufayli qurilish ostiga tushgan yer maydonidan 8 dona mevali hamda 1 dona manzarali daraxt kesilgani aniqlangan.
Ushbu holat yuzasidan masjidning ma’sul xodimiga nisbatan Ma’muriy javobgarlik to‘g‘risidagi kodeksning 79-moddasi 1-qismi bilan bayonnoma rasmiylashtirilib, 1 million 650 ming so’m jarima hamda tabiatga yetkazilgan zarar 8 million 580 ming so‘m hisoblangan.
Masjid bosh imomiga kesilgan daraxtlar o‘rniga O‘zbekiston iqlim sharoitiga mos manzarali daraxt ko‘chatlarini ekish va parvarish qilish majburiyati yuklatilgan.