Zinedin Zidan “An-Nassr”ning 150 mln yevrolik taklifini rad etdi

Fransiyalik murabbiy Zinidin Zidan Saudiya Arabistonining “An-Nassr” klubida ishlash taklifini rad etdi. Bu haqda Foot Mercato xabar berdi.

Xabarga ko‘ra, “An-Nassr” “Real Madrid” sobiq murabbiyiga ikki yillik faoliyati uchun 150 million yevro taklif qilgan. Biroq fransiyalik mutaxassis bu taklifni rad etgan. Qayd etilishicha, Zinidin Zidan Yevropaning top-5 ligalarida o‘ynaydigan jamoalarning aloqaga chiqishini kutmoqda.

Ma’lumot uchun, fransiyalik murabbiy 2021-yilda “Real”ni tark etgan va shundan beri hech qaysi jamoada ishlamadi.

“An-Nassr” Saudiya Arabistoni chempionatida 28 turdan keyin 63 ochko bilan 2-o‘rinda bormoqda. Ar-Riyod shahri jamoasi bosh murabbiyi Rudi Garsiya iste’foga chiqarilgach, uning vazifasini Dinko Yelichich egallagandi. Jamoa safida Zidan bilan “Real”da birga ishlagan Krishtianu Ronaldu to‘p suradi.

Fransiyaning “PSJ” jamoasi ham Zinidin Zidanni bosh murabbiy etib tayinlashni xohlayotgani haqida xabarlar tarqagandi. 

Avvalroq “PSJ” futbolchisi Lionel Messiga ham Saudiya Arabistoni klubi tomonidan yiliga 500 million yevrodan ko‘proq maoshli shartnoma taklif qilinayotgani xabar berilgandi. Shuningdek, hujumchining “Al-Hilol”ga o‘tishida mamlakat hukumati ham ishtirok etishi mumkinligi ma’lum bo‘lgan. Saudiyaliklar Leoni mamlakatga olib kelish uchun uning qator jamoadoshlarini ham taklif etmoqchi ekani e’lon qilingandi.