Frankfurt-Mayn sudi Germaniyadagi bir qancha ko‘chmas mulklar va «Dilbar» yaxtasida o‘tkazilgan, go‘yoki Alisher Usmonovga qarshi surishtiruvga aloqador deb xabar berilgan tintuvlarni noqonuniy deb topdi.
Bu haqda «GAUVAYLER I ZAUTER» yuridik idorasi advokatlariga ma’lum qilishdi. Ushbu qaror 2023 yil 12 mayda qabul qilingan. Frankfurt-Mayn mintaqaviy sudi prokuratura va polisiyaga tintuv o‘tkazishga ruxsat bergan to‘rtta orderni noqonuniy deb topdi va ularni apellyasiya berish huquqisiz bekor qildi.
Advokatlarning ta’kidlashicha, apellyasiya sudi xulosalari ular federal hukumatga bir necha bor bildirgan fikrlarni tasdiqlaydi, xususan: Germaniya tergov organlarining Alisher Usmonovga nisbatan harakatlari xolisona asoslanmagan va aslida siyosiy tusga ega: “Umid qilamizki, Germaniya Federativ Respublikasi noqonuniy tergov harakatlari natijasida yetkazilgan zararni qoplaydi, shuningdek, ushbu voqealar to‘g‘risida avvalroq ma’lumot yuborilgan matbuot nashrlariga ko‘rilgan barcha tezkor chora-tadbirlarni noqonuniy deb e’tirof etish bo‘yicha tushuntirishlar yuboradi”.
Ushbu voqealar munosabati bilan bir qator mashhur ommaviy axborot vositalarida allaqachon izohlar berildi. Xususan, Spiegel gazetasi o‘z materialida qayd etishicha, sud xulosasiga ko‘ra, prokuratura Usmonovning pul yuvishdagi dastlabki gumonini asoslab bera olmagan. Bundan tashqari, sud prokuratura tomonidan foydalanilgan manbalar ob’ektiv tekshiruvdan o‘tkazilmagani va asossiz taxminlar ekanligini tanqid ostiga oldi. Sud, shuningdek, tintuv o‘tkazish bo‘yicha qarorda yo‘l qo‘yilgan bir qator qo‘pol rasmiy xatolarni ham tanqid qildi.
Alisher Usmonovning vakili ham Germaniya sudining adolatli qarorini olqishladi:
“Biz uchun boshidanoq bu jinoiy ta’qibning siyosiy mohiyati shubha uyg‘otmaganidek, bu tergov uchun qonuniy asoslar yo‘qligi ayon edi. Sudning xulosalari ayblovlar to‘liq asossiz bo‘lganini ta’kidlaydi va nemis soliq to‘lovchilari tomonidan to‘lanadigan matbuot ishtirokidagi keng ko‘lamli tergov tadbirlarining maqsadga muvofiqligi va asosliligi masalasini yana bir bor kun tartibiga olib chiqadi. Umid qilamizki, Germaniyada Usmonovga nisbatan ta’qiblar to‘xtatiladi".
Izoh (0)