Ozarbayjon va Armaniston bir-birining hududiy yaxlitligini tan olishga kelishib oldi. Rossiya matbuoti xabariga ko‘ra, tegishli bayonotlar 25-may kuni Moskvada bo‘lib o‘tgan Oliy Yevrosiyo iqtisodiy kengashi yig‘ilishida Armaniston bosh vaziri Nikol Pashinyan va Ozarbayjon prezidenti Ilhom Aliyev tomonidan bildirilgan.
“Shuni tasdiqlamoqchimanki, Armaniston va Ozarbayjon bir-birining hududiy yaxlitligini o‘zaro tan olish to‘g‘risida kelishib oldi va shu asosda munosabatlarimizni tartibga solish yo‘lida ancha yaxshi qadamlar tashlayapmiz”, — deya Nikol Pashinyan so‘zlaridan iqtibos keltirgan “TASS”.
22-may kuni Pashinyan Yerevanda bo‘lib o‘tgan matbuot anjumanida Tog‘li Qorabog‘ni Ozarbayjonning bir qismi sifatida tan olishini, lekin u yerdagi armanlar xavfsizligi ta’minlanishi shart ekanini aytgandi.
Shundan kelib chiqib, 25-may kuni Ilhom Aliyev Boku va Yerevanda tinchlik kelishuviga erishish imkoniyati borligini ta’kidladi.
Aliyev va Pashinyan o‘rtasidagi kelishmovchiliklar
Shu bilan birga “RIA Novosti” agentligining xabar berishicha, Nikol Pashinyan Oliy Yevrosiyo iqtisodiy kengashining kengaytirilgan yig‘ilishida Ilhom Aliyevning “Zangezur yo‘lagi” iborasini qo‘llashidan noroziligini bildirgan. Aliyevning Ozarboyjonni Noxichevon muxtor respublikasi bilan bog‘laydigan Zangezur yo‘lagini tilga olishi, Armaniston bosh vazirining so‘zlariga ko‘ra, Bokuning Yerevanga nisbatan hududiy daʼvolari bilan bog‘liq. Pashinyan taʼkidlaganidek, Armaniston, Ozarbayjon va Rossiya rahbarlarining uch tomonlama bayonotida faqat Lochin yo‘lagi (Armanistonni Tog‘li Qorabog‘ bilan bog‘laydi) haqida gap bor.
Bunga javoban Aliyev o‘z so‘zlarida hududiy daʼvolar yo‘qligini va u ishlatgan “yo‘lak” atamasi xalqaro amaliyotda qabul qilinganini ta’kidladi.
Armaniston va Ozarbayjon rahbarlari o‘rtasidagi kelishmovchiliklarga Lochin yo‘lagidagi vaziyatga turlicha baho berilishi ham sabab bo‘lgan: Pashinyanga ko‘ra, yo‘lak hozir bloklab qo‘yilgan, Aliyev buni rad etmoqda.
Izoh (0)