Niderlandiya prokuraturasi Amsterdam chekkasidagi Rossiya prezidenti Vladimir Putinning to‘ng‘ich qizi Mariya Vorontsovaning sobiq turmush o‘rtog‘i Yorrit Faassenga tegishli yer uchastkasini hibsga oldi.
“Proyekt” jurnali, Niderlandiyaning Follow the money nashri va The Guardian jurnalistlari aniqlik kiritishicha, prokuratura Faassenning Duyvendrext qishlog‘idagi uchastkasini 12-may kuni hibsga olgan.
Ilgari ushbu yer uchastkasi Putinning do‘stlari — biznesmenlar Arkadiy va Boris Rotenbergga tegishli edi. 2019-yilda Faassen uni 450 ming yevroga sotib olgan va 2021-yilda u yerda turar joy binosi hamda oltita ofis qurishga qaror qilgan, deb yozadi “Proyekt”.
Rossiya prezidenti sobiq kuyovining tanishi aytishicha, Faassen yaqinda Amsterdamga uchgan, biroq ko‘p o‘tmay Rossiyaga qaytishga majbur bo‘lgan, chunki Niderlandiya huquq-tartibot idoralari u bilan qiziqib qolgan. Nashrlar suhbatdoshi Faassenga nisbatan da’volar haqida batafsil ma’lumot bermadi.
“Proyekt”ning Niderlandiya razvedka xizmatlaridagi manbasi Faassen Amsterdamga kelgan paytda so‘roq qilinganini eshitganini eytdi. Biroq u ushbu ma’lumotni tasdiqlay olmadi.
Mulkning hibsga olinishi Faassenga qarshi jinoiy ish ochilganini anglatadi, deydi advokat Xelen over de Linden. Ammo hozircha, mavjud hujjatlarga tayanib, bu haqda aniq bir narsa deyish qiyin, deb tushuntiradi u.
Niderlandiya fuqarosi Yorrit Faassen va Mariya Vorontsova 2008-yilda turmush qurishgan. Meduza va Current Time nashrlari xabar berishicha, bu nikoh rasman ro‘yxatga olinmagan. Bu Faassenga G‘arb sanksiyalaridan qochish imkonini berdi. OAV yozishicha, Faassen va Vorontsovaning Roman ismli o‘g‘li bor.
Izoh (0)