Afg‘oniston va Xitoy 24-maydan boshlab to‘g‘ridan to‘g‘ri aviareyslarni ochadi. Bu haqda “Tolibon” hukumati Tashqi ishlar vazirligi matbuot kotibi Abdulqahhor Balxiy “Tolibon” rahbari Amirxon Muttaqiy va Xitoyning Kobuldagi elchisi Van Yu o‘rtasidagi uchrashuvdan so‘ng Twitter’da ma’lum qildi.
“Xitoy elchisi Xitoy Afg‘oniston bilan normal munosabatlarni saqlab turishini va ularni yanada mustahkamlashga tayyorligini aytdi. U Afg‘oniston—Xitoy o‘rtasidagi to‘g‘ridan to‘g‘ri reyslar 24-maydan boshlanishini qo‘shimcha qildi”, — deb yozadi Balxiy.
Uning qo‘shimcha qilishicha, Muttaqiy mamlakatlar o‘rtasida to‘g‘ridan to‘g‘ri reyslar boshlanishini “munosabatlarni mustahkamlash uchun yaxshi imkoniyat” deb atagan va Pekinni viza rejimini yanada soddalashtirishga chaqirgan.
Van Yu 23-may kuni “Tolibon” ichki ishlar vaziri Sirahuddin Haqqoniy bilan ham uchrashdi, deb xabar bermoqda Khaama Press mamlakat ichki ishlar vazirligiga tayanib. Uchrashuvda Xitoy elchisi Pekin Afg‘onistonni qo‘llab-quvvatlashi va mamlakat gullab-yashnashi uchun erkin va mustaqil muhit zarur, deb hisoblashini aytgan.
“Biz sanksiyalar, bosim va boshqa mamlakatlarning ichki ishlarga aralashish siyosatini qo‘llab-quvvatlamaymiz”, — deya qo‘shimcha qilgan elchi.
May oyi boshida “Tolibon” Xitoy va Pokiston bilan Afg‘onistonni Xitoyning “Bir kamar, bir yo‘l” tashabbusiga qo‘shishga kelishib olgandi. Bloomberg yozganidek, bu BMT va AQSH sanksiyalari ostida qolgan Kobulga kelajakda infratuzilma loyihalarini moliyalashtirish uchun milliardlab sarmoyalarni jalb qilish imkonini beradi.
Izoh (0)