Tashqi ko‘rinishi tufayli rad etilgan bo‘lsa-da, iste’dodi bilan muvaffaqiyatga erishgan o‘zbek shou-biznesi vakillari

San‘at sohasida tashqi ko‘rinish muhim ahamiyatga ega, deyishadi. Ammo bu tashqi ko‘rinish ijodkorning mahoratini belgilaydi, degani emas. Quyida tashqi ko‘rinishi tufayli rad etilgan bo‘lsa-da, tinimsiz mehnat evaziga muvaffaqiyat qozongan mashhurlar haqida hikoya qilinadi. 

Nilufar Sotiboldiyeva: “Dildora Rustamovadek chiroyli emassan, deyishgan”

— Institutni bitirish arafasida o‘zimni televideniye sohasida sinab ko‘rishga qaror qilganman. “Davr” informatsion ko‘rsatuvining ingliz tili redaksiyasiga ish so‘rab borganimda talaffuzim ularga ma’qul bo‘lmagan. Telekanallarda o‘tkaziladigan juda ko‘p ko‘rsatuvlar kastingida ishtirok etganman. Ammo birortasida yaxshi natijaga erishmaganman. Bir kuni Dildora Rustamova studiyaga kirib ketayotgan ekanlar. “Dildora opa matnlarni o‘qishingizga havasim keladi, studiyaga siz bilan kirsam bo‘ladimi?”, deb so‘raganman. Rasmiy xabarlar o‘qiladigan studiya qattiq nazorat qilinadi, Dildora opa kiyimlarini qo‘limga tutib, “Amallaymiz”, degan. Kiyim bahona qorovullar ichkariga kiritishgan. Dildora opa efirga tayyorgarlik ko‘rayotganda, yonimga yoshi katta chiroq ustasi kelib, kimligimga qiziqqan. O‘zimni tanishtirganimdan keyin “Sendan diktor chiqmaydi. Dildorani qara, qanaqa chiroyli sen bo‘lsa... Yoqimtoysan, ammo baribir diktor bo‘lolmaysan”, degan. Mana shu gap yuragimga qattiq botgan, — deydi Nilufar Sotiboldiyeva.

Bobur Mansurov: “Epizodni o‘ynashni 8 yil kutganman”

— O‘zbekiston davlat san‘at va madaniyat institutiga o‘qishga kirgan yilimdan boshlab, to 8 yilga qadar kastinglarda ishtirok etganman. Qizig‘i, hamma kursdoshlarim kastinglardan o‘tishardi. Ammo men biror marta epizodga ham qabul qilinmaganman. “Ko‘rinishim yoqmaydimi, shunchalik xunukmanmi?”, deb o‘z-o‘zimga savol berardim. Hatto bir serialning kastingidan barcha kursdoshlarim o‘tishgan, men esa o‘tolmaganman. Bir tomondan kursdoshlarimning yutug‘idan quvondim, boshqa tomondan esa ichimda g‘alati g‘alayon bo‘lgan. Shundan keyin rol berishmasa, o‘zim rejissor bo‘laman deb xususiy telekanalga ishga kirganman. To‘rt oy ikkinchi rejissor vazifasida ishlab, bir tiyin ham haq olmaganman. Ijoddan qoniqmaslik va pulsizlik sabab Rossiyaga ishlashga ketmoqchi ham bo‘lganman, — deydi Bobur Mansurov.

Dilshoda Rustamjonova: “Aktrisa chiroyli bo‘lishi kerak, deyishgan”

—  San’atga bo‘lgan qiziqishim sabab qayerda kasting bo‘layotganini eshitsam, albatta yetib borardim. Chunki meni bu borada qo‘llab-quvvatlaydigan ishongan insonim yo‘q edi. Ammo iste’dodli bo‘lganingiz bilan sizni qo‘llab-quvvatlaydigan inson bo‘lmasa, juda qiyin. Deyarli juda ko‘p kastinglardan o‘tmaganman. Ammo hech umidimni uzmasdim. “Aktrisa bo‘lish uchun chiroyli bo‘lish kerak”, deb tashqi ko‘rinishimga e’tiroz bildirilgan paytlar ham ko‘p bo‘lgan. Ana o‘sha vaqtdagi gaplar ko‘nglimga juda og‘ir botardi, ammo o‘zimni qo‘lga olib, kulib chiqib ketardim. Munisa Rizayevaning ilk yakkaxon konsertidagi kichik sahna ko‘rinishida ishtirok etganman. Menga umuman haq to‘lanmagan, ammo juda xursand bo‘lganman. Bu eng katta muvaffaqiyatim edi, — deydi aktrisa Dilshoda Rustamjonova.

Dilshod Nazarov: “Tipajingiz uncha emas ekan, deyishgan”

— O‘zbekiston san‘at va madaniyat institutiga o‘qishga kirishga ketma-ket uch yil hujjat topshirganman. Ammo kirish ballini to‘play olmaganman. Aktyor bo‘laman deb juda ko‘p kastinglarda ishtirok etganman. Hatto, bir marta rol bermay turib, “Tipajingiz unchamas ekan-da”, deyishgan. Taksichilik qilib yurgan paytlarimda bitta tanishim serial olinayotgani haqida aytib qolgan. “Bedor tuyg‘ular” nomli serialda sotuvchi yigit rolini ijro etganman. Bu rolda suratga tushishim uchun 100 ming so‘m berganman. Ammo serial qaysi kanalda namoyish etilganini ham bilmayman, — deydi bloger.

Dilnoza Kubayeva: “Rejissor ozsang, filmga olaman, degan”

— Zulfiqor Musoqovga “Qachon meni ham filmingizga taklif etasiz?” deb so‘raganimda “Dilnoza to‘lishib ketibsan, 10 kg vazn tashlasang rol bor”, degan. Mana shu gapdan keyin ozishga jiddiy kirishdim. Keyin menga “Osmondagi bolalar-3” filmidagi shifokor ayol roli berildi, — deydi Dilnoza Kubayeva.

Dilshod Mirzamurodov: “Rejissorlar 10 yil deganda epizod rol berishgan”

 — Ishonasizmi, 27 yoshimga qadar kinodagi rollarga tasdiqlashmagan. Rejissorlarga ko‘rinishim, ovozim yoki mahoratim yoqmas edi. San’at sohasiga kirib kelganimga 10 yil bo‘lganida “Hur qiz” filmida chiptachi rolini ijro etganman. Bu qahramonning ko‘rsatiladigan daqiqasi shunchalik kamki, tomoshabinlar uning bor-yo‘qligini ham payqashmasa kerak. Ikkinchi rolim esa Javlon Shodmonovning “Zamonaviy sovchilar” filmida yaratilgan. Undagi rolim ham juda kichik edi, ammo o‘zimni katta ekranda ko‘rib rosa quvonganman, — deydi Dilshod Mirzamurodov.