Xorazm viloyati Urganch shahridagi maktablar yonida yangi namunadagi yo‘l yotiq chiziqlari chizilmoqda. Bu haqda viloyat Yo‘l harakati xavfsizligi boshqarmasi xabar berdi.
Qayd etilishicha, ayni paytda boshlang‘ich sinf o‘quvchilariga chorrahalar va avtomobillar gavjum joylarda yo‘ldan o‘tish qoidalari o‘rgatilmoqda. Bunda o‘quvchilarning harakatlanish mezoni 4 bosqich asosida amalga oshirilmoqda.
YHXB xabariga ko‘ra, o‘quvchilar:
- o‘tish joyiga yaqinlashib, bolalar yangi belgida to‘xtab, chapga, keyin esa o‘ngga qaraydi;
- tartibga solinmagan chorrahadan esa transport vositalari to‘liq to‘xtaganiga ishonch hosil qilgandan keyin yo‘lni kesib o‘tadi;
- qo‘llarini yuqoriga ko‘tarib, mashinalar to‘xtaganiga ishonch hosil qilib, shundan so‘ng yo‘ldan o‘tadi;
- yo‘ldan o‘tib bo‘lgach, mashinalarga o‘girilib, haydovchilarga minnatdorlik bildiradi.
“O‘quvchilarga yo‘l harakati qoidalari va xavfsiz harakatlanish asoslarini o‘rgatish borasidagi bunday ishlar yosh avlodni yo‘l harakatining madaniyatli ishtirokchisi etib tarbiyalash, bolalar hayotini saqlab qolish, ular ishtirokidagi baxtsiz hodisalarning oldini olishga xizmat qiladi”, — deyiladi xabarda.
Izoh (0)