UzAuto Motors kompaniyasi avtomobillarni yetkazib berish jarayonlarini tezlashtirish maqsadida Chevrolet Damas va Labo avtomobillarini ishlab chiqarish hajmini ko‘paytirish dasturini yakunladi.
Ma’lum qilinishicha, endilikda amalga oshirilgan chora-tadbirlar ushbu talabgir modellarning ishlab chiqarish hajmini yiliga 150 ming donaga bosqichma-bosqich oshirish imkonini beradi, bu esa o‘z navbatida yetkazib berish muddatiga ham o‘z ta’sirini o‘tkazadi.
Zavodning ishlab chiqarish quvvatini bosqichma-bosqich oshirish 2016-yildan buyon ishlab chiqarish hajmini deyarli 5 barobar ko‘paytirishga imkon berdi. UzAuto Motors’ning Xorazm filialida ishlab chiqarishni optimallashtirish va modernizatsiya qilish bo‘yicha olib borilgan tizimli ishlar 2022-yilga kelib ishlab chiqarish hajmini 93 000 dan ortiq avtomobilga oshirdi (2021-yilga nisbatan qariyb 30 foizga ko‘p).
UzAuto Motors 2021-yilda ishlab chiqarish hajmini oshirish dasturi doirasida Pitnak shahrida yangi press-syexni ishga tushirdi. 1 gektardan ortiq hududda yo‘lga qo‘yilgan ishlab chiqarish, maksimal quvvatga erishgandan so‘ng har yili 12 ming tonna metall listdan Chevrolet Damas va Labo modellari uchun 7 million donagacha turli shtamplash kuzov qismlarini ishlab chiqarish imkonini beradi.
Butlovchi qismlarni mahalliylashtirish, ayrim komponentlarni dekontenting qilish (arzonroq variantiga almashtirish) va ishlab chiqarish jarayonlarini unifikasiya qilish bo‘yicha amalga oshirilgan chora-tadbirlar importni qisqartirgan holda ishlab chiqarish hajmini oshirishga imkon beradi.
Izoh (0)