Tojikiston hukumati teraktlarda halok bo‘lgan yoki aksilterror amaliyotlari davomida o‘ldirilgan terrorchilarni dafn etishning yangi qoidalarini tasdiqladi – endi ularning jasadlari qarindoshlariga berilmaydi. Bu haqda “Ozodi” xabar bermoqda.
Xabarga ko‘ra, hujjat 28-aprelda qabul qilingan, Adliya vazirligi uni 5-mayda davlat ro‘yxatidan o‘tkazgan, biroq rasmiy ochiq manbalarda e’lon qilinmagan. “Ozodi” hukumat qarorining nusxasini 22-may kuni olishga muvaffaq bo‘lgan.
Yangi qoidalarga ko‘ra, dafn qiluvchi mahalliy hokimiyat va tashkilotlar terrorchilarning jasadlarini tergov organlari ko‘rsatgan yerga ko‘mishlari shart. Jasadlar dafn joyiga yopiq tobutlarda yetkaziladi. Dafn qilingan joy haqida kimgadir aytish taqiqlanadi.
Dafn etish kitobida terrorchining familiyasi, ismi, otasining ismi, tug‘ilgan va vafot etgan sanasi, shuningdek, qabrining raqami yozilmaydi. Hujjatda faqat dafn etilgan sana, o‘lim to‘g‘risidagi tibbiy ma’lumotnomani kim bergani, shuningdek, dafn etishni amalga oshirgan tashkilotning nomi va manzili ko‘rsatiladi.
Aksilterror operatsiyasi chog‘ida halok bo‘lgan chet elliklar va fuqaroligi bo‘lmagan shaxslarning o‘limi to‘g‘risida tegishli davlatlarning diplomatik vakolatxonalari yoki konsullik muassasalari Tojikiston Tashqi ishlar vazirligi orqali xabardor qilinadi.
Avval respublika rasmiylari aksilterror amaliyotlari chog‘ida halok bo‘lganlarni qarindoshlariga dafn qilishga ruxsat berar edi. Dafn marosimida odatda marhumning cheklangan miqdordagi qarindoshlari qatnashgan, jasadlar huquq-tartibot idoralari nazorati ostida o‘likxonadan qabristonga yetkazilgan.
Tojikiston rasmiylari vaqti-vaqti bilan terrorchilar hibsga olingani haqida xabar berib keladi, shuningdek, turli maxsus operatsiyalar davomida o‘ldirilgan fuqarolarni terrorizmga aloqadorlikda ayblaydi. Xalqaro inson huquqlari tashkilotlari va G‘arb davlatlari Tojikiston hukumatini ekstremizm va terrorizmga qarshi kurash bahonasida fuqarolik jamiyati faollari va dissidentlarga qarshi repressiyalarni kuchaytirayotganlikda ayblab keladi.
Izoh (0)