Buxoro viloyatida faoliyat yurituvchi tadbirkorlar Bosh prokuror Nig‘matilla Yo‘ldoshevning Qarshi shahrida bo‘lib o‘tgan sayyor qabulida bo‘lib, Epsilon kompaniyasining zo‘ravonligidan shikoyat qildi. Bu haqda mazkur qabulda bo‘lgan “Daryo” muxbiri xabar berdi.
“Olot neft va gaz qidiruv ekspeditsiyasi” MCHJ masʼuli Qoryog‘di Ochilovning aytishicha, Epsilon kompaniyasi MCHJga qarashli 5 dona Rossiyada ishlab chiqarilgan “Uralmash-3D” burg‘ulash qurilmalarini zo‘ravonlik bilan tortib olib, hech qanday haq to‘lamagan holda foydalanib kelmoqda.
“Biz bu bo‘yicha sudga ham murojaat qildik. Sud Epsilon kompaniyasiga 2019-yil mart oyida mulkni qabul qilish va topshirish dalolatnomalari orqali berilgan 5 komplekt burg‘ulash qurilmalarini 2022-yil o‘z egasiga topshirish majburiyatini yukladi. Bu haqda hatto Oliy sud qarori ham bor. Bu majburiyatni bajarishi kerak bo‘lgan MIB esa o‘ziga yuklatilgan vazifani uddalay olmaganligi bois, hamon o‘zimizga tegishli burg‘ulash uskunalarini ololganimiz yo‘q. Shu masalada Bosh prokurordan yordam so‘rab keldik”, — deydi Bosh prokurordan umid qilib borgan Qoryog‘di Ochilov.
Murojaatchilarning aytishicha, ular Bosh prokuror qabuliga kirolmagan.
“Bizning ishimiz sud orqali MIBning Bobur Panjiyev ismli masʼuliga yuklatilgan ekan. Ijro harakatlari qanday ketayotganini bilish va uskunalarimizni tezroq olish uchun Buxorodan Qashqadaryoga besh soatlab yo‘l yurib, umid bilan kelamiz. Ammo MIB masʼuli bizni qabul ham qilmaydi. Kimga murojaat qilishga hayronmiz. MIB xodimi qayerga borsang bor, Epsilon’dan bu uskunalarni undirish bizning qo‘limizdan kelmaydi dedi. Shu sabab Qarshi shahrida bo‘lib o‘tgan Bosh prokuror qabulidan umid qilib kelgandik. Lekin Bosh prokuror qabuliga kirolmadik. Bizni Bosh prokuraturaning 17-bo‘limdagi masʼullar qabul qilishdi. Epsilon masalasi qiyin, uni bajarib bo‘lmayapti deyishyapti”, — deydi murojaatchilar.
MCHJda boshqaruv raisi o‘rinbosari sifatida ishlab kelayotgan Ibrohim Cho‘lliyevning maʼlumot berishicha, MCHJ Rossiyada ishlab chiqarilgan “Uralmash-3D” burg‘ulash qurilmalarini 2017-yilda sotib olgan bo‘lib, ayni kungacha xarid shartnomasida ko‘rsatilgan pullarni to‘lab kelmoqda.
“Eng qizig‘i 2017-yilda xarid qilingan burg‘ulash uskunalarining pulini hali-hamon biz to‘layapmiz. Lekin bundan Epsilon foydalanmoqda. Buning uchun bizga na pul to‘laydi, na biror bir haq beradi. Qaysi tashkilotga murojaat qilsak, Epsilon’ga kuchimiz yetmaydi deydi. Qanday qilib, sud chiqargan qarorni ijro qilmaslik mumkin? Buning uchun MIBga qonuniy vakolat berilgan-ku”, — deydi MCHJ direktori o‘rinbosari.
Mazkur holatga izoh bergan MIBning Qashqadaryo viloyat boshqarmasi masʼuli Bobur Panjiyev “Olot neft va gaz qidiruv ekspeditsiyasi” MCHJ avval “O‘zbekneftgaz”ga qarashli tashkilot bo‘lganini, shu sabab 5 ta burg‘ulash uskunasi “O‘zbekneftgaz” mulki bo‘lganini, ammo tashkilot “O‘zbekneftgaz” tarkibidan chiqayotgan paytda burg‘ulash uskunalari MCHJ balansida qolib ketganini aytmoqda.
“Epsilon shu vaj bilan bizga chiqib, ‘O‘zbekneftgaz’ga qarashli burg‘ulash uskunalari Vazirlar Mahkamasi qaroriga asosan ularga berilganini, ayni paytda ham uskunalar davlat mulki ekanini aytib, MCHJga qatarib bermasligini bildirgan. Va shu sabab ham sudga murojaat qilgan”, — deydi masʼul.
Taʼkidlanishicha, sud qaroriga ko‘ra 5 ta burg‘ulash uskunasini MCHJga olib berish haqidagi ijro hujjati Byuroning Muborak tuman bo‘limi ish yurituviga 2022-yilning 4-iyun kuni kelib tushgan.
“Koson tumanlararo iqtisodiy sudining 2022-yil 24-martdagi ijro varaqasiga asosan qarzdor Epsilon Development Company MCHJ zimmasiga 2019-yil mart oyida mulkni qabul qilish va topshirish dalolatnomalari orqali berilgan 5 komplekt Rossiyada ishlab chiqarilgan ‘Uralmash-3D’ burg‘ulash qurilmalarini undiruvchi ‘Olot neft va gaz qidiruv ekspeditsiyasi’ MCHJga qaytarib berish majburiyati yuklangan. Yuklash to‘g‘risidagi ijro hujjati byuroning Muborak tuman bo‘limi ish yurituviga 2022-yil 4-iyulda kelib tushgan. Ijro harakatlari davomida qarzdordan 1 komplekt burg‘ulash qurilmalari undiruvchi ‘Olot neft va gaz qidiruv ekspeditsiyasi’ MCHJga olib berilgan”, — deyiladi MIBning viloyat boshqarmasi rasmiy axborotida.
Bobur Panjiyevning aniqlashtirishicha, qarzdor Epsilon Development Company MCHJ 2023-yil 10-mart kuni xat bilan murojaat qilib, “Olot neft va gaz qidiruv ekspeditsiyasi” MCHJga qaytarilishi belgilangan 5 komplekt burg‘ulash uskunalari Vazirlar Mahkamasining 2019-yil 6-fevraldagi 97-sonli qaroriga asosan ularga berilganini, qaror hali ham amalda va bekor qilinmaganligini bildirgan.
“Shunga ko‘ra 2023-yil 15-mart kuni Koson tumanlararo iqtisodiy sudga tushuntirish so‘rab ariza bilan murojaat qilingan. Kelgusida sudning yakuniy xulosasiga asosan ijro harakatlari amalga oshiriladi”, — deydi MIB masʼuli.
Murojaatchilar MIBning sud qarorini bir yildan beri ijro qilmayotganidan noroziligini taʼkidlamoqda.
“MIB mulk kimniki, qay tartibda bizga kelib qolgan, nega kelib qolgan degan savollarni o‘rtaga tashlamay, sud qarorini muhokama qilmay, ijro bilan shug‘ulanishi kerak emasmi? Yoki MIB har doim sudning qarorini muhokama qilib, qarorga ishonchsizlik bildirib keladimi? Uning ishi qarorni ijro qilish emasmi?”, — deydi mulkini ololmayotganini aytayotgan murojaatchilar.
“Daryo” voqealar rivojini kuzatishda davom etadi.
Izoh (0)