Toshkent shahrining Sergeli tumanida kuchli ta’sir qiluvchi dori vositalarini sotmoqchi bo‘lgan dorixona ishchisi qo‘lga olindi, deb xabar beradi Bosh prokuratura huzuridagi department.
Qayd etilishicha, departamentning Sergeli tuman bo‘limi tomonidan DXX xodimlari bilan hamkorlikda tezkor tadbir o‘tkazilgan. Tadbirda “Z.F.” MCHJga qarashli dorixona sotuvchisi Sh.R. fuqaro D.A.ga 4 dona “Zardeks” nomli kuchli taʼsir qiluvchi dori vositasini 200 ming so‘mga sotgan vaqtida ashyoviy dalillar bilan ushlangan. Shuningdek, uning yonidan o‘tkazish maqsadida olib kelingan jami 89 dona oq-qizil kapsuladagi dori vositalari ashyoviy dalil sifatida olingan.
Shu kabi “H.F.” MCHJga qarashli dorixona sotuvchisi X.A. 4 dona “Zardeks” nomli dori vositasini 200 ming so‘mga sotgan vaqtida ushlanib, uning yonidan jami 22 dona dori vositalari ashyoviy dalil sifatida olingan.
Mazkur holatlar yuzasidan Jinoyat kodeksining 251-1-moddasi (kuchli taʼsir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)