20-mayga o‘tar kechasi Qirg‘iziston Respublikasining sobiq prezidenti Asqar Akayev rafiqasi Mayram Akayeva bilan “Oq Yo‘l” nazorat-o‘tkazish punktidan o‘tib Qirg‘izistonga kirib kelgan. Bu haqda chegara xizmatidagi manbalarga tayanib, “Kaktus.media” xabar bermoqda.
Asqar Akayev 2021-yilda ikki marta Qirg‘izistonga tashrif buyurgandi. Birinchi marta u “Qumtor” ishi bo‘yicha tergov doirasida Milliy xavfsizlik davlat qo‘mitasiga so‘roqqa chaqirilgan. Shundan so‘ng u Moskvaga qaytib ketgan.
Bu safar Akayevlarning Qirg‘izistonga tashrifidan maqsad — ular Milliy fanlar akademiyasi va Politexnika institutida maʼruzalar o‘qishi rejalashtirilgan. Juftlik 2005-yildan beri ilk bor vataniga birgalikda tashrif buyurmoqda.
2023-yil yanvarida Asqar Akayevga nisbatan “Qumtor” konini qazishdagi korrupsiya bilan bog‘liq jinoiy ish to‘xtatilgani ma’lum bo‘lgandi.
So‘nggi 10 yil ichida Mayram Akayeva o‘zi tug‘ilgan Talas viloyatiga bir necha bor tashrif buyurgan.
Ma’lumot uchun, Asqar Akayev 1990-yil 27-oktabrdan 1991-yil 31-avgustgacha Qirg‘iziston SSR prezidenti, 1991-yil 31-avgustdan 2005-yil 11-aprelgacha Qirg‘iziston respublikasi prezidenti bo‘lgan. U to‘rt marta (1990, 1991, 1995, 2000) prezidentlik saylovlarida g‘alaba qozongan.
2005-yil 24-martda politsiya bilan to‘qnashuv, prezident qarorgohining o‘rab olinish va talon-taroj qilinishi bilan kechgan xalq noroziligi natijasida Akayev maxsus xizmatlar yordamida mamlakatdan qochishga muvaffaq bo‘lgan.
Ommaviy noroziliklarga saylovlardagi soxtalashtirishlar, shaxsiy manfaatni ko‘zlab Konstitutsiyaga noqonuniy o‘zgartirish kiritishlar sabab bo‘lgan.
O‘shandan beri Akayevlar oilasi Moskvada istiqomat qiladi. Qirg‘izistonning sobiq prezidenti Moskva universitetlaridan birining professori va u yerda dars beradi.
Korotovskix Yevgeniy, Qirg‘iziston
Izoh (0)