“Daryo”da Qashqadaryo viloyatining Qarshi shahrida prokuratura xodimi pichoqlangani haqida xabar berilgandi. Viloyat prokuraturasi mazkur holat bo‘yicha qo‘shimcha maʼlumot berdi.
Qayd etilishicha, 2023-yil 26-aprel kuni Qarshi shahrida yashovchi fuqaro X.B. tanish ayolining uyiga borganida u yerda tanishi O.T. (sobiq MIB xodimi)ni ko‘rib qolib, janjallashgan. Va oshxonadan pichoqni olib kelib, ularga turli darajadagi tan jarohatlari yetkazgan. Natijada jabrlanuvchilar shifoxonaga tushgan.
“Shuningdek, X.B. ayol bilan qonuniy nikohdan o‘tmagan holda doimiy ravishda jismoniy va ruhiy tazyiq o‘tkazib, uni qiynab kelgani aniqlangan. Mazkur holat yuzasidan Qarshi shahar prokuraturasi tomonidan 2023-yil 1-may kuni X.B.ga nisbatan Jinoyat kodeksining 109-modda (qasddan badanga yengil shikast yetkazish) 110-modda (qiynash) va 112-modda (o‘ldirish yoki zo‘rlik ishlatish bilan qo‘rqitish)lar bilan jinoyat ishi qo‘zg‘atilib, dastlabki tergov harakatlarini olib borilmoqda”, — deyiladi viloyat prokuraturasi axborotida.
Qashqadaryo prokuraturasining rasmiy axboroti haqida fikr bildirgan “Daryo” manbasi pichoqlangan xodim o‘sha kuni shifoxonaga murojaat qilib, uyida yarim tunda o‘t o‘rayotib, o‘roqdan jarohat olganini bildirganini aytmoqda.
“Viloyat prokuraturasining rasmiy axborotida chalkashliklar ko‘p. Nega ikki erkak o‘z-o‘zidan tortishib, pichoqlashib ketgan. Buning sababi nimada? Qolaversa, gumondor qiynoqqa solish, o‘ldirish bilan qo‘rqitishda ayblanayotgan ekan. Nega xodimni qiynoqqa solgan? Nega uni o‘ldirish bilan qo‘rqitgan. Shu masalalar ochiq qolgan”, — deydi u.
Izoh (0)