Qirg‘izistonda Ukrainaga qarshi urushda qatnashgan fuqaro 10 yilga qamaldi

Qirg‘izistonda Rossiya qurolli kuchlari tarkibida Ukrainaga qarshi urushda qatnashgan fuqaro 10 yilga qamaldi. Bu haqda “RBK” xabar berdi.

Hukm Bishkekning Pervomayskiy tuman sudi tomonidan e’lon qilingan. Urush ishtirokchisi Qirg‘iziston Jinoyat kodeksining “urushga yollanish” moddasi bo‘yicha sudlangan. Respublika fuqarosi 2022-yilda tan olinmagan Lugansk Xalq Respublikasining (LXR) xalq militsiyasiga qo‘shilishga qaror qilgan. 

Sentabrdan noyabrgacha u “oldingi chiziqni moddiy taʼminlash bilan shug‘ullangan”, deyiladi hukmda. Sudlanuvchi o‘z aybiga to‘liq iqror bo‘lgan. Mahkum harbiy xizmatga borishdan oldin 12 yil, jumladan, “Ozon” omborida ishlaganini aytgan.

Eslatib o‘tamiz, O‘zbekiston Jinoyat kodeksining 154-1-moddasida chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga yollanish 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanishi ko‘zda tutilgan.