Buxoro viloyati IIB G‘ijduvon tumanidagi cho‘lda erkaklar bir ayolga kuch ishlatib, uni jinsiy aloqa qilishga majburlagani tasvirlangan video yuzasidan ma’lumot berdi.
Ijtimoiy tarmoqlarda ayolni bir necha shaxs kuch ishlatish yo‘li bilan zo‘rlamoqchi bo‘layotgani aks etgan video tarqaldi. Ma’lum qilinishicha, holat Buxoro viloyati Ichki ishlar boshqarmasi mas‘ul xodimlari tomonidan o‘rganilgan.
Aniqlanishicha, 30-mart kuni soat taxminan 13:00 larda G‘ijduvon tumani “Sarmijon” mahallasida yashovchi 29 yoshli D.B. tanishi, shu mahallada yashovchi 32 yoshli S.G. ismli ayolni tumanning “Qoraxoni” mahallasi “Jilvon” cho‘l hududiga olib borib, uning erkiga zid ravishda jinsiy aloqada bo‘lgan. Holat erkak bilan birga borgan sherigi tomonidan videotasvirga olingan.
Ushbu video tasvir orqali uni o‘ziga qaram qilib, yonida bo‘lgan boshqa 3 nafar tanishlari bilan ham jinsiy aloqada bo‘lishga majbur qilgan.
Mazkur holat yuzasidan Jinoyat kodeksining 121-moddasi (shaxsni jinsiy aloqa qilishga majbur etish) 2-qismi bilan jinoyat ishi qo‘zg‘atilib, ish yuzasidan gumon qilinuvchi 3 nafar shaxslar Jinoyat-protsessual kodeksining 221-moddasi (jazoni ijro etish muassasasi maʼmuriyatining qonuniy talablariga bo‘ysunmaslik) tartibida ushlanib, dastlabki tergov harakatlari davom ettirilmoqda.
“Yuqoridagi kabi holatlarni OAV yoki ijtimoiy tarmoqlarda eʼlon qilish dastlabki tergovning haqqoniy, odilona va to‘liq olib borilishiga xalaqit berishi, o‘zingiz bilmagan holda sir tutilishi mumkin bo‘lgan tergov harakatlarini oshkor qilishingiz esa dalillarning yo‘qotib yuborilishiga sabab bo‘lishi mumkin”, — deya ogohlantiradi IIB.
Bundan oldin Toshkent viloyati Yangiyo‘l tumanida yashovchi 19 yoshli yigit 10 kun davomida voyaga yetmagan qizni bo‘sh uyda saqlab, uni o‘zi bilan jinsiy aloqa qilishga majburlab kelgani ma’lum bo‘lgandi. Yigit butun jarayonni videotasvirga olgan va keyinroq qizni o‘zi bilan yana yotishi uchun shantaj qilib kelgan.
Izoh (1)
ha bu nimasi bo'ldi