Turkiya prezidenti Rajab Toyyib Erdo‘g‘on Olti muxolifatchi partiyasi alyansidan (Xalq alyansi) prezidentlikka nomzod Kamol Qilichdaro‘g‘lining Rossiya haqidagi bayonotini qoraladi. Bu haqda Anadolu xabar berdi.
Rajab Toyyib Erdo‘g‘on saylovdagi asosiy raqibining bayonotini “uyatli” deb baholadi.
“Endi janob Kamol Rossiyani g‘ashini keltirishni boshladi. U Turkiyadagi saylovlarga Rossiya boshchilik qilyapti, deydi. Senga uyat emasmi? Uyalgin. Agar Amerika, Germaniya, Fransiya yoki Britaniya saylov jarayoniga aralashyapti desam, qanday reaksiya bildirgan bo‘larding?”, — deydi Erdo‘g‘on.
U xorijiy davlatlar bilan aloqa qilishda 20 yillik tajribaga egaligi, ularning asl niyatlarini yaxshi bilishini ta’kidladi. Erdo‘g‘on bir qator G‘arb OAVlarining amaldagi hukumat muxoliflarini qo‘llab-quvvatlovchi nashrlariga e’tibor qaratdi.
Turkiya yetakchisiga ko‘ra, Qilichdao‘g‘li va unga o‘xshaganlarning bayonotlari mamlakat taraqqiyotini to‘xtatish va “Turkiyaning 100 yilligi” konsepsiyasi maqsadlariga erishishga to‘sqinlik qilmoqchi.
Turkiyada prezidentlik va parlament saylovlari 14-mayga belgilangan. Prezidentlikka nomzodlarning hech biri 50 foiz ovoz ololmasa, ikkinchi tur 28-may kuni bo‘lib o‘tadi.
Kamol Qilichdaro‘g‘lining Rossiya haqidagi bayonoti
Kamol Qilichdaro‘g‘li Rossiyani fitnada ayblab, “Turkiya davlatidan qo‘lini tortishni” talab qildi. U Turkiyada fosh etilgan montajlar, fitnalar, Deep Fake kontenti va yozuvlar ortida Rossiya turganini aytdi.
“15-maydan keyin ham do‘stligimizni davom ettirmoqchi bo‘lsangiz, qo‘lingizni Turkiyadan uzoq tuting. Biz hamkorlik va do‘stlikni qo‘llab-quvvatlashda davom etamiz”, — dedi u.
Kremlning munosabati
Rossiya prezidenti matbuot kotibi Dmitriy Peskov Kreml Turkiyadagi prezidentlik saylovlariga aralashganini rad etdi. U Rossiya boshqa davlatlarning “ichki ishlari va saylov jarayonlariga aralashmasligi” va Turkiya bilan munosabatlarni qadrlashini ta’kidladi.
“Biz rasman shuni e’lon qilamizki, hech qanday aralashuv haqida gap bo‘lishi mumkin emas. Agar kimdir janob Qilichdaro‘g‘liga shunday ma’lumot bergan bo‘lsa, ular yolg‘onchidir”, — degan u.
Izoh (0)