Yaqinda Aydan Shener 60 yoshga to‘ldi. “Choliqushi” yulduzi bundan 40 yil oldin tomoshabinlar qalbini zabt etgan, ammo hozir ham filmlarda rol o‘ynashda davom etmoqda. Biroq bugungi kunda aktrisa nafaqat filmlarda suratga tushish, balki xayriya ishlari bilan ham band.
Aydan Shener 1963-yilda Turkiyada tug‘ilgan. 18 yoshida u “Turkiya go‘zali” tanlovida qatnashib, g‘olib bo‘ladi. O‘sha yili u “Dunyo go‘zali”da ham ishtirok etadi, ammo u yerda muhim o‘rinni egallolmaydi.
Bir muncha vaqt Aydan model bo‘lib ishlaydi, reklama roliklarida suratga tushadi va moda jurnallarining muqovalarida paydo bo‘ladi. 1983-yilda qiz “Kichik xo‘jayin” serialida rol o‘ynaydi.
Shenerning aytishicha, agar aktrisa bo‘lmaganida, jurnalistlikka o‘qirdi. Zero jurnalistikaga maktab davridanoq ishtiyoqi baland edi. U shunday dedi: “Men yangi odamlar bilan tanishishni yaxshi ko‘raman — odamlar bilan muloqot qilishni, kuzatishni, mulohaza yuritishni va shunchaki sevishni yaxshi ko‘raman”.
1983-yilda u futbolchi Ayxan Akbinga turmushga chiqadi. Bu nikohdan ularning Edgem ismli qizi dunyoga keladi. Aktrisaning so‘zlariga ko‘ra, eri Aydanning aktrisalik qilishiga qarshi bo‘ladi, tug‘ilgan kunida unga paranji sovg‘a qiladi. Bir-birlarini tushuna olmagan juftlik 8 yillik turmushdan keyin ajralishadi.
Aktrisaning go‘zalligi hech kimni befarq qoldirmaydi. U kino ijodkorlarida ham katta taassurot qoldiradi. 1986-yilda “Choliqushi” serialida o‘ynaganida izlanuvchan aktrisa 23 yoshda edi. Bu rol unga olamshumul shuhrat keltiradi.
1989-yilda Shener “Somon yo‘li” teleserialida ham bosh rolda o‘ynaydi. 1991-yilda u “Istanbulning ikki yuzi” teleserialida uni aqldan ozar darajada sevgan halol va odobli yigitning o‘rniga, boy kuyovni tanlagan qiz rolini o‘ynaydi.
U yangi filmlarda suratga tushishni faol davom ettiradi — o‘sha vaqtda aktrisa 10 dan ortiq filmlarda ishtirok etadi. “Bir manzilli sevgi” telefilmi va “Hayotdan quvilish”, “Qalbimdagi dengiz” seriallari shular jumlasidandir. Yaqinda u “Menejerimga qo‘ng‘iroq qiling” serialining bir epizodida va “Yurak og‘rig‘i” serialining 18 epizodida suratga tushdi.
Ajralishdan keyin Aydan qayta turmushga chiqmadi. U hayotini qiziga va uysiz hayvonlarga yordam berishga bag‘ishladi. Hozirda u egasiz qolgan hayvonlarni qo‘llab-quvvatlashga qaratilgan ijtimoiy loyihalarda ishtirok etadi. Ijtimoiy tarmoqlardagi sahifalarida hayvonlar bilan tushgan suratlarni tez-tez qo‘yib turadi.
“Men hayvonlarni odamlar kabi yaxshi ko‘raman. Ularning barchasi begunoh va bizga haqiqatan ham kerak. Lekin hayvonlarga yomon munosabatda bo‘lgan odamlarni yoqtirmayman. Umuman olganda, o‘zimni yaqin yillarda uysiz mushuk va itlar yashaydigan kichik boshpana egasi sifatida ko‘raman”, — deydi aktrisa.
Aktrisaning qizi onasining izidan bormaslikka qaror qilgan, garchi u aktrisalikka o‘qigan va hatto bir nechta teleseriallarda o‘ynagan bo‘lsa-da. Hozirda qiz arxitektura va dizaynga juda qiziqadi. Shener u haqida shunday deydi: “U mening hayotim. Qizim haqiqiy idealist va menga Ferideni eslatadi”.
Bugungi kunda Aydan Shener nafaqat seriallarda rol o‘ynaydi, balki turli teleshoularda tez-tez mehmon bo‘lib, teatr spektakllarida ham ishtirok etadi. Shener jami 30 dan ortiq filmlarda rol o‘ynagan va ularning barchasi shu qadar xilma-xilki, uni bitta rolli aktrisa deb hisoblash adolatdan bo‘lmaydi.
Izoh (0)