Farg‘ona viloyatida Ikkinchi jahon urushi qatnashchilariga prezidentning bayram tabrigi hamda 18 million so‘mdan pul mukofoti topshirilmoqda, deya xabar berdi “Daryo” muxbiri Azizjon Ermatov.
Qayd etilishicha, viloyat hokimi Xayrulla Bozorov, Sharqiy harbiy okrug qo‘shinlari qo‘mondonligi, Mudofaa va xavfsizlik tizimlari rahbarlari, jamoatchilik vakillari viloyatning shahar va tumanlarida bo‘lib, urush qatnashchilari holidan xabar olgan.
Farg‘ona tumani Vodil qishlog‘ida yashovchi Orifjon ota Mo‘minov urushdan so‘ng kolxozda traktorchilik qilib, turmush o‘rtog‘i Maxfiratxon aya bilan 13 nafar farzandni tarbiyalab, voyaga yetkazgan. Bugun esa nevara-yu evaralar bag‘rida umrguzaronlik qilmoqda. Orifjon otaga prezident tabrigi, pul mukofoti va qimmatbaho sovg‘alar topshirildi.
Tursunbek ota Isanbekov Farg‘ona tumanining Xonqiz qishlog‘ida yashaydi. 1944-yil 19 yoshida urushga ketib, 1950-yilda qaytgan. So‘ng kolxozda brigadirlik qilgan. Turmush o‘rtog‘i Habibaxon aya bilan 3 o‘g‘il, 5 qizni tarbiyalab uyli-joyli qilgan.
Mindon qishlog‘ida yashovchi Qoraboy ota Teshaboyev bugun 101 yoshda. 1941-yilda qishloqdoshlari qatori birinchilardan bo‘lib jangga otlangan. Qoraboy ota birinchi bor Stalingrad ostonalarida jangga kirib, Ukraina, Polsha, Vengriya, Chexoslovakiya davlatlaridagi janglarda qatnashgan. Urush tugagandan keyin ham uch yil xizmatni davom ettirib, 8 yil deganda Vatanga qaytib kelgan.
Tantanali tadbirlar davomida ularga ham viloyat rahbari tomonidan prezident tabrigi va bayram sovg‘alari topshirilgan.
Qayd etilishicha, ayni kunda viloyatda 19 nafar urush qatnashchisi istiqomat qiladi.
Izoh (0)