Andijonda 1902-yili ro‘y bergan zilzila oqibatida shahar va uning atrofidagi qishloqlar katta talafot ko‘rgan. Yer ketma-ket uch marta silkinib, 9 ball va undan yuqori bo‘lgan. Oqibatda minglab odamlar halok bo‘lgan, o‘n minglab binolar buzilgan, shahar vayron bo‘lgan. Aynan shu ofat tufayli Andijon tarixiy qiyofasini yo‘qotgan.
Tarix fanlari doktori, professor Rustambek Shamsutdinovning “Daryo” muxbiriga bergan intervyusida aytishicha, zilzilaning ko‘lami shu darajada katta bo‘lganki, butun vodiyga tarqalgan.
“Zilzilaning zarari iqtisodiy jihatdan Andijonga juda katta zarba bo‘lgan va bu fojia rus imperiyasining butun sarhadlariga tarqalgan. Hamma joydan: Kavkaz, Ukraina Rossiyadan Andijonga yordam uyushtirilgan. Shu vaqtda hattoki Rossiya imperatori Nikolay II va ayoli andijonliklarga alohida mablag‘ ajratgan”, — dedi tarixchi olim.
Uning alohida taʼkidlashicha, zilziladan aziyat chekkanlarga ziyolilar ham mablag‘ ajratgan.
“Misol qilib aytishimiz mumkinki, yozuvchi Chexov o‘z pyesalarini teatrlashtirib, undan tushgan pullarni Andijondagi zilzila fojiasida jabr chekkan insonlar uchun safarbar qilgan”, — dedi Rustambek Shamsutdinov.
Avvalroq Andijonda ro‘y bergan zilzilalar ko‘lami qay daraja bo‘lgani haqida material eʼlon qilingan edi.
Izoh (0)