Toshkentning Mirzo Ulug‘bek tumanida fuqaroni vizasiz AQSHga yubormoqchi bo‘lgan shaxslar ushlandi. Bu haqda Bosh prokuratura huzuridagi departament xabar qildi.
Departamentning Mirzo Ulug‘bek tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda, “L.” MCHJ rahbari M.U. va boshqalar fuqaro Z.S.ni tanishlari yordamida vizasiz Turkiya va Meksika orqali AQSHga ishga jo‘natish evaziga 25 ming dollar olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
AQSHga noqonuniy yo‘llar bilan yuborish holatlari
Mart oyida Toshkentda fuqaroni 20 ming dollar evaziga AQSHga yubormoqchi bo‘lgan talaba ushlangani, Samarqand shahrida 64 nafar fuqaroni AQSHga yuborishini aytib, ularning 4 milliard so‘mini o‘zlashtirganlarga sud hukmi o‘qilgani to‘g‘risida xabar berilgandi. Aprelning o‘rtalarida DXX AQSHga ishga yuborish uchun 30 ming dollar so‘ragan shaxsni qo‘lga olgandi.
Izoh (0)