Qirg‘iziston prezidenti Sadir Japarovning matbuot kotibi Erbol Sultonboyev AQSH vakillarini mamlakatning ichki ishlariga aralashmaslikka chaqirdi. Bu haqda Sputnik xabar berdi.
Bishkekning Leninskiy tuman sudi Qirg‘iziston—Tojikiston chegarasidagi voqealar haqida yolg‘on ma’lumot tarqatgani uchun Ozodlik radiosining qirg‘iz xizmati faoliyatini tugatish to‘g‘risida qaror qabul qildi. Shu tariqa sud Madaniyat, axborot, sport va yoshlar siyosati vazirligining da’vosini qanoatlantirdi. Ozodlik Radiosi mazkur qaror ustidan shikoyat qilishini bildirdi.
“Biz Kongress Vakillar palatasining Xalqaro aloqalar qo‘mitasi rahbari, shuningdek, AQSH Davlat departamentining Ozodlik haqidagi bayonotlari bilan tanishdik. Ular bu bayonotlarni haqiqiy vaziyatni bilmagan holda e’lon qilgani aniq, chunki ular Qirg‘izistondan uzoqda”, — dedi Sultonboyev.
Unga ko‘ra, Madaniyat vazirligi qonunda ko‘rsatilgan vakolatlar doirasida ish olib borgan, so‘ngra sud organlariga murojaat qilgan va ular ko‘rib chiqish jarayonida tegishli qarorni qabul qilgan.
“Mamlakatimizda sud tizimi mustaqil va erkin qaror qabul qiladi. Uning ishiga hech kimning aralashishga haqqi yo‘q... Qirg‘iziston ochiq va erkin davlat, u yerda so‘z va ommaviy axborot vositalari erkinligiga hech qanday cheklovlar yo‘q. Har bir inson uchun yagona shart — qonunga qat’iy amal qilgan holda faoliyat yuritishdir”, — dedi Qirg‘iziston prezidenti matbuot kotibi.
Izoh (0)