“Kinochilar uyi”da bir yarim yil mobaynida mahoratli rejissor Dilmurod Masaidov tomonidan suratga olingan “Sudya” filmining premyerasi bo‘lib o‘tdi. Loyihada bosh rolni ijro etgan aktrisa Shodiya Abduqodirova nima sababdan ekranlarda ko‘rinish bermayotgani, yangi film bilan ishlashda qanday qiyinchiliklarga duch kelgani haqida so‘zlab berdi.
“Hozirgi kunda farzandlarimning tarbiyasi bilan bandman. Oilaviy muhitda onaning o‘rni beqiyos. Mendan yaxshi rol ijro etadigan aktrisalar ko‘p, biroq onaning o‘rnini hech kim bosa olmaydi. Hozir oilamga ko‘proq vaqt ajratyapman, bu esa baxt.
Ssenariy meni o‘ziga maftun etdi. Oxirgi paytlarda rol, ssenariy tanlashga jiddiy qarayapman. Hayotda shunday payt bo‘larkanki, vaqtni nimaga sarflayotganimiz ko‘proq qiziq bo‘lib qolarkan. Agar farzandlarimdan vaqtimni orttirib, filmlarga, suratga olish jarayonlariga arzisagina borishim mumkin. Jiddiy, yuki bor filmlarda suratga tushishga harakat qilyapman.
Bu loyihada aktyor erkinligini talab qilmaydigan rol o‘ynayman, chunki hamma narsa yozilgan, qolip bor, ssenariy bor, tartib bo‘yicha davom etishi kerak. Obrazimning ayol, rafiqa, ona sifatidagi kechinmalarini ifodalashda rejissor erkinlik berdi. O‘ylaymanki, bu to‘g‘ri qaror. Bu jarayonda inson sudyaning mantiyasini kiygandan keyin uning qolipiga tushishga majbur bo‘ladi”, — deydi aktrisa Shodiya Abduqodirova.
“Dilmurod Masaidov bilan ishlash juda qiyin. U juda ham talabchan rejissor, bizga bergan vazifalari ham oddiy emas. U shunchaki oddiy onaning rolini o’ynab bering, demaydi. Iloji boricha bergan topshiriqlariga quloq solgan holatda ishlashga harakat qildik. O‘ylaymanki, talabiga javob beradigan film bo‘ldi, chunki filmni rejissorning o‘zi ko‘ra biladi. Har bir rejissor rassom bo‘ladi. Olayotgan narsasini o‘zi chizib chiqadi, shuning uchun biz aktrisa, aktyor sifatida rejissorning talabini bajarishga harakat qildik, lekin shunga yarasha qiyinchiliklar ham bo‘ldi”, — deydi aktrisa Muyassar Berdiqulova.
“Filmni suratga olish jarayonlarida katta qiyinchiliklar bo‘ldi. Xalqimizning olqishi, chiroyli munosabati bilan bu qiyinchiliklar esdan ham chiqib ketdi. Juda ko‘p nomzodlar ko‘rib chiqilgan edi. Bu loyiha aslida 30 qismli serial edi. Rol uchun yettita nomzod ko‘rilgan edi, shulardan Shodiyaga nasib qildi, uni tanlaganimiz to‘g‘ri bo‘ldi deb o‘ylayman. Umumiy suratga olish jarayonlari olti oy davom etdi. Bu dam olish kunlari, boshqa sabablar bilan cho‘zildi”, — deydi film rejissorining yordamchisi.
Sudya ayolning hayot yo‘li haqida hikoya qiluvchi yangi serial
Kinematografiya agentligi buyurtmasiga binoan suratga olingan “Sudya” seriali Aziza ismli sudya ayolning hayot yo‘liga bag‘ishlangan. Filmda Azizaning shaxsiy hayoti bilan parallel ravishda sudya sifatidagi faoliyati hikoya qilinadi.
Serial Aziza timsolida yurtimizda faoliyat olib borayotgan barcha sudyalarga bag‘ishlanadi. Serialning maqsadi sudyalar ham boshqa insonlar kabi xatolarga yo‘l qo‘yishi, o‘z vaqtida xatolarini tuzatishi va eng asosiysi, ular ham barcha odamlardek oddiy insonlar ekanligi, lekin ularning hayotdagi bosh g‘oyasi adolat va haqiqatni qaror toptirishga xizmat qilish ekanligini tomoshabinga badiiy talqinda yetkazishdan iborat. Shuningdek, serialda davlatimiz rahbarining “sudlar adolat qo‘rg‘oni bo‘lishi kerak”ligi haqidagi ko‘rsatmasi hayotga qay darajada tatbiq etilayotgani haqida aniq dalillar bilan hikoya qilinadi.
Izoh (0)