Aktrisa Dilshoda Rustamjonova YouTube’dagi “Daryo Lifestyle” kanaliga bergan intervyusida ustozining tanbehi sabab masallar ustida ishlagani, kadrda chiroyli ko‘rinish uchun o‘zini cheklamasligi va bo‘lajak turmush o‘rtog‘i haqidagi savollarga javob berdi.
— O‘zbekiston davlat san’at va madaniyat institutiga kirishda har bir abituriyent hech bo‘lmaganda bitta masalni aytib berishi kerak. Ijodiy imtihonda bunga alohida e’tibor beriladi. Men ham institutga hujjat topshirmasimdan avval qo‘g‘inchoq teatrida ishlaydigan ustozim Mirzohid Jumaboyevdan masal aytish san’atini o‘rganganman.
Ammo ikkinchi kursda tahsil olayotganimda “Sahna nutqi” fani ustozim Dilrabo Jumanova “Menga aytgan masalingiz yoqmadi, qichqirib tashladingiz”, deb ikki baho qo‘ygan. O‘shanda “Hali ko‘rasiz, zo‘r masallar aytaman”, deb dilimga tugib qo‘ygandim. Masal yodlashni yaxshi ko‘raman. Qancha masal bilishimni o‘zim ham bilmayman. Chunki menga yod olish unchalik qiyinchilik tug‘dirmaydi.
Bir kuni ko‘rsatuvlardan biriga mehmon sifatida taklif qilishdi. Boshlovchi biror narsa ijro etib bering deganda masal aytib bergandim. Xullas, ana shundan keyin ijroyimdagi masallar ko‘pchilikka yoqib qoldi. Hozir qayerga borsam, masal aytib berishimni so‘rashyapti.
Masal aytishni Valijon Shamsiyev boshlab bergan ekan. So‘nggi yillarda sahnalarda aytilmagani uchun xalq sog‘inganmi bilmadim juda iliq qarshi olishdi, — deydi Dilshoda Rustamjonova.
Aktrisa rol ijro etayotganda o‘ziga ma’lum cheklovlar qo‘ymasligi va tabiiylikni qadrlashi haqida ham aytib o‘tdi.
— Menda kadrda xunuk ko‘rinib qolsam-chi, degan qo‘rquv yo‘q. Shu bois o‘zimga hech qanday cheklov qo‘ymayman. Sherning rolini o‘rnayotgan bo‘lsam og‘zimni katta ochib nara tortishim yoki quyondek g‘ilay bo‘lishim mumkin. Keyin tabiiylikka alohida e’tibor beraman. Tabiiy qiyofadagi insonning rolga moslashishi ham oson bo‘ladi. Afsuski, keyingi paytlarda sun’iy yuzlar ko‘payib ketdi. Rejissor Zulfiqor Musoqov “Novda” filmiga aktrisa tanlayotganda Ra’no Shodiyevaga “Yuzingni yuvib chiq” degan ekan. Aktrisa sepkillari borligini aytsa ham yuzini yuvdirib, keyin kastingdan o‘tkazgan ekan. Men ham hech qachon yuzimga ortiqcha bezak bermayman deb niyat qilganman, — deydi aktrisa Dilshoda Rustamjonova.
Aktrisa turmushga chiqayotgani va turmush o‘rtog‘i bilan “Quvnoqlar va zukkolar” loyihasida ishtirok etayotganida tanishgani haqida so‘zlab berdi.
— Bo‘lajak turmush o‘rtog‘im bilan 2019-yilning 15-may kuni O‘zMUning madaniyat saroyida o‘tkazilgan “Quvnoqlar va zukkolar” musobaqasida tanishib qolganmiz. Ammo u inson menda unchalik yaxshi taassurot qoldirmagan. Keyinchalik u inson bilan bir guruhda ishtirok etadigan bo‘ldik va munosabatlarimiz aka-singildek edi. Haqiqatan ham munosabatlarimiz aka-singildek samimiy edi. Bu orada u inson o‘qish uchun Qozog‘istonga ketdi men esa ijod bilan ovora bo‘lib qoldim. Ko‘p muddat umuman gaplashganimiz yo‘q. U inson mendan 6 yosh katta, fe’l-atvori ham butunlay boshqacha. Men shaddod, g‘ayratli bo‘lsam u ancha sokin. Xullas, 2022-yilga kelib u inson uylanadigan bo‘lib, onalarining tavsiyasiga ko‘ra men bilan yana bog‘landi. Chunki bo‘lajak qaynonam juda yaxshi inson, menimcha o‘g‘liga meni maqtagan. U inson yolg‘iz o‘g‘il, san’atimni tushunadimi yo‘qmi deb biroz ikkilangandim. “Vaziyatga qarab ish tutamiz, san’atingizni qadrlayman”, deganidan keyin rozi bo‘ldim. Eng qizig‘i, oilalarimiz ham bir ko‘rishgandayoq bir-biriga ma’qul kelishdi, — deydi aktrisa Dilshoda Rustamjonova.
Izoh (0)