Ukraina prezidenti Vladimir Zelenskiy o‘zini yomon ota deb bilishini aytdi. Uning so‘zlariga ko‘ra, hozir farzandlarini rafiqasi — birinchi xonim Yelena Zelenskaya va urush tarbiyalamoqda.
Bu haqda prezident skandinaviya jurnalistlariga bergan intervyusida ma’lum qildi, deb yozadi Yle. Zelenskiy urush uning ruhiy holatiga sezilarli darajada ta’sir qilayotganini, lekin u shunchaki dam ololmasligini aytdi.
“Barcha fojialarni boshimdan o‘tkazyapman. Urushga o‘rganib qolganmiz, deyishga haqqim yo‘q”, — deydi Ukraina rahbari.
Zelenskiy va rafiqasi Yelenaning ikki farzandi bor. Ukraina prezident urush olib borayotgan mamlakatni boshqarish bilan bir vaqtda otalik vazifalarini ado etish imkonsiz ekanini tan oldi.
“Odamlar meni yomon prezident emas, deyishadi, lekin men hozirda aniq yaxshi ota emasman. Farzandlarimni rafiqam va urush tarbiyalamoqda”, — deydi u.
Shunga qaramay, Ukraina prezidenti optimistligicha qolayotganini aytdi. Uning qo‘shimcha qilishicha, Ukrainaga tegishli birinchi hududning ozod etilishi uning uchun “yangi hayot taʼmi” bo‘lgan.
Keng miqyosli urush paytida Zelenskiy kamdan kam hollarda oilasi haqida omma oldida gapiradi. Urushning bir yilligi munosabati bilan so‘zlagan nutqida prezident rafiqasi va bolalari urush paytida Ukrainada qolishga qaror qilganini aytgandi.
“Men ularni yaxshi ko‘raman. Rafiqam, farzandlarim men uchun asosiy odamlar. Ularni tez-tez ko‘raman. Ota-onamni esa umuman ko‘rish imkoni yo‘q”, — degan u.
Ukraina rahbari farzandlari va mamlakat uchun hamma narsaga tayyor rafiqasi bilan faxrlanishini qo‘shimcha qilgan.
Izoh (0)