Toshkent shahrida Sog‘liqni saqlash vazirligi bilan hamkorlikda O‘zbekiston reproduktiv tibbiyot assosiatsiyasining “Reproduktiv texnologiyalar — yangi hayotga yo‘l” mavzusidagi I kongressi ish boshladi.
Anjumanda dunyoning 15 ta davlatidan qariyb 100 nafar olimlar, ekspertlar va investorlar ishtirok etmoqda. Tadbirda so‘zga chiqqan Sog‘liqni saqlash vaziri Amrillo Inoyatov sog‘liqni saqlash sohasida xususiy sektor ulushi yildan yilga ortib borayotganini e’tirof etdi.
“Ilgari reproduktiv tibbiyot yo‘nalishida davlat va xususiy sektor hamkorligi yaxshi yo‘lga qo‘yilmagan edi. Vaholanki, bugun yurtimizda akusherlik va ginekologiya, pediatriya, reproduktologiya bo‘yicha 1500 dan ziyod xususiy tibbiyot tashkilotlari faoliyat olib bormoqda.
Biz kelgusida ushbu muassasalar imkoniyatlaridan samarali foydalanish, sohaga investitsiyalarni yanada keng jalb qilish maqsadida 15 ta perinatal markaz va 3 ta respublika darajasidagi tug‘uruq muassasalarida davlat-xususiy sheriklik asosida “Yordamchi reproduktiv texnologiyalar markazlari”ni tashkil etmoqchimiz”, — dedi vazir.
Xususan, yordamchi reproduktiv texnologiyalar asosida xizmat ko‘rsatuvchi 10 dan ziyod klinikalarning 6 tasi chet el investorlari ishtirokida tashkil qilingan. Amrillo Inoyatov so‘zini davom ettirib, xalqaro vakillar va mahalliy mutaxassislarga o‘zaro hamkorlik bo‘yicha qator takliflar bildirdi. Jumladan, xususiy tug‘uruq komplekslarini barpo etishga chaqirib, u yerda ko‘rsatilgan xizmatlarni davlat tomonidan sotib olinishiga kafolat berilishini ta’kidladi.
Izoh (0)