Qirg‘iziston prezidenti Sadir Japarov kirillcha yozuvga asoslangan qirg‘iz tilini lotin alifbosiga o‘tkazish bo‘yicha o‘z fikrini bildirdi. Bu haqda AKIpress xabar berdi.
Japarov Davlat tili bo‘yicha milliy komissiya raisi Qanibek Osmonaliyevga keskin bayonot berib, ularni til siyosati, xususan, qirg‘iz tilini lotin tiliga o‘tkazish borasidagi beparvo gaplardan saqlanishga chaqirdi.
“Qirg‘iz tilining lotin alifbosiga o‘tishi haqida gapirishga hali erta. Kirill alifbosida davlat tilini to‘g‘ri, malakali bilish darajasini ta’minlamasdan turib, lotin alifbosiga o‘tish haqida gap bo‘lishi mumkin emas. Hozir bu savol kun tartibida emas, davlat tilini rivojlantirish kirill alifbosida davom etishi kerak”, — dedi Japarov.
19-aprel kuni Jogorku Kenesh “Davlat tili to‘g‘risida”gi konstitusiyaviy qonun loyihasini ikkinchi o‘qishda qabul qildi. Muhokama chog‘ida deputat Emil Toktoshev alifboni lotin alifbosiga o‘tkazish zarurligi haqida Osmonaliyevning fikrini so‘radi.
“Agar Jogorku Kenesh va prezident siyosiy qaror qabul qilsa, ziyolilar va olimlar lotin alifbosiga o‘tishga tayyor”, — deb javob bergandi u.
Qirg‘izistonda rus tili rasmiy til maqomiga ega. Mamlakat hududida kirill alifbosiga asoslangan yozuv qo‘llanadi.
Eslatib o‘tamiz, XIX asrning birinchi yarmida qirg‘izlar arab yozuvidan foydalangan. 1911-yilda birinchi qirg‘iz bosma nashrlari paydo bo‘lgan.
1927-yil 12-dekabrda Qirg‘iziston ASSR (avtonom sovet sotsialistik respublikasi) Markaziy ijroiya qo‘mitasi lotinlashtirilgan alifboni davlat alifbosi deb tan oldi. Keyinchalik, 1940-yilda Qirg‘iziston SSR Oliy soveti kirill alifbosiga o‘tishni ma’qulladi.
Izoh (0)