Qirg‘iziston prezidenti Sadir Japarov va Vazirlar Mahkamasi rahbari Oqilbek Japarovning parvozlari haqidagi har qanday materiallar maxfiylashtiriladi. Bu haqda Qirg‘iziston parlamenti deputati Dastan Bekeshev Twitter’dagi sahifasida ma’lum qildi.
Avvalroq Qirg‘iziston rahbari matbuot kotibi Erbol Sultonboyev Bombardier Challenger yoki Embraer Legacy xususiy samolyoti ijaraga berilishini ma’lum qilgandi.
2023-yil boshida esa aksar qirg‘izistonlik bloger va jurnalistlar Qirg‘iziston rahbari xorijiy xizmat safarlariga haddan tashqari ko‘p pul sarflayotgani va mamlakat uchun og‘ir iqtisodiy vaziyatda charter bilan emas, oddiy aviareyslar orqali parvoz qilish mumkinligi haqida materiallar chop etgandi.
Qirg‘iziston rahbari biznes-jetda parvoz qilganida, uning fotografi samolyot kadrga tushmasligi uchun prezidentni maxsus burchakdan suratga olardi.
Avvalroq, 16-mart kuni Qirg‘iziston davlat rahbari Turkiyaga Embraer Lineage 1000 samolyotida parvozni amalga oshirgandi. Uning bir soatlik parvozi 14 ming dollardan oshgan.
Qirg‘iziston Vazirlar Mahkamasi rahbari Oqilbek Japarov 3-fevral kuni xususiy Beechcraft Premier samolyoti yordamida Olmaotaga uchib ketgan. Qo‘shni davlatga bunday parvoz budjetga 1 million 165 ming somga (13 312 dollar) tushgan.
Izoh (0)