Samarqand shahriga 2023-yilda uzunligi 10,5 metr bo‘lgan 100 dona elektrobus xarid qilinishi va park qurish rejalashtirilgan. Bu haqda Samarqand viloyati hokimligi axborot xizmati xabar berdi.
Investitsiyalar va tashqi savdo vazirligi, Samarqand viloyati hokimligi hamda Yevropa tiklanish va taraqqiyot banki o‘rtasida Samarqand shahrida jamoat transporti uchun 350 dona elektrobus xarid qilish va tegishli infratuzilmani yaratish bo‘yicha 95 million dollarlik loyiha amalga oshirilmoqda.
Ayni paytda loyihaning birinchi bosqichi bo‘yicha ishlar olib borilmoqda. Xususan, uzunligi 10,5 metr bo‘lgan dastlabki 100 dona elektrobus energetika uskunalarini xarid qilish, elektroavtobus parkini qurish rejalashtirilgan.
Qayd etilishicha, 100 dona elektrobus sotib olish bo‘yicha o‘tkazilgan xalqaro tenderlar natijalariga ko‘ra Xitoyning Yutong Bus Co.Ltd kompaniyasi g‘olib bo‘lgan. U 30-yanvar kuni loyiha operatori sifatida “Samarqand yo‘lovchitrans” davlat korxonasi bilan 29,7 million yevro miqdorida shartnoma imzolagan.
Mazkur elektrobuslarning 6 donasi Samarqand shahriga 2023-yilning birinchi yarim yilligida, qolgan 94 donasi esa uchinchi chorak yakuniga qadar yetkazib beriladi.
Toshkentda jamoat transporti
2023-yil 16-fevraldagi “Jamoat transporti tizimini isloh qilish chora-tadbirlari to‘g‘risida”gi prezident qaroriga asosan, Toshkent shahri jamoat transporti uchun 200 dona 18 metrli va 500 dona 12 metrli tabiiy gazda ishlaydigan avtobuslar hamda 300 dona 12 metrli elektrobuslar xarid qilish belgilangan.
Xitoyning Yutong Bus Co Ltd kompaniyasi va “Toshshahartransxizmat” o‘rtasida tuzilgan shartnomaga asosan, 2023-yilning mart oyi yakuniga qadar Yutong avtobuslarning 1-partiyasi, ya’ni 110 dona avtobus va 150 dona elektrobuslar O‘zbekistonga yetkazib berilishi kutilayotgani to‘g‘risida xabar berilgandi.
Davlat rahbari 13-dekabr kuni Uchtepa tumani faollari bilan o‘tkazilgan yig‘ilishda bosh vazirga mart oyigacha Toshkentga 1000 dona avtobus olib kelish bo‘yicha topshiriq berganini aytgandi. “Jamoat transportini isloh qilishimiz zarur. Yutuqlar bilan birga, kamchiliklarimiz ham juda ko‘p”, — degandi prezident.
Izoh (0)