O‘zbekistonda hafta o‘rtasidan sovuq ob-havo chekina boshlaydi

O‘zbekiston bo‘yicha 17–21-aprel kunlariga ob-havo prognozi e’lon qilindi.

Unga ko‘ra, 17–18-aprel kunlari O‘zbekiston hududining katta qismida quruq, lekin salqin ob-havo bo‘lishi kutilmoqda. Faqat Farg‘ona vodiysi viloyatlari va Surxondaryo viloyatida ba’zi joylarda yomg‘ir yog‘adi, momaqaldiroq bo‘lishi mumkin. Ayrim joylarda do‘l yog‘ishi ehtimoli bor.

Cho‘l hududlari va Farg‘ona vodiysida shamol tezligi 17-22 metr/sekundgacha kuchayishi, ba’zi joylarda chang to‘zon bilan kuzatilishi kutilmoqda. Kunduzgi harorat 12-15 daraja, respublika shimolida 7-12 daraja iliq atrofida bo‘ladi. Kechasi harorat pasayib, 2-7 daraja iliq, shimolda ba’zi joylarda 3 daraja sovuq bo‘ladi.

19-apreldan boshlab antisiklon respublika hududidan chekina boshlaydi va ish haftasining oxirigacha O‘zbekiston bo‘yicha quruq ob-havo kuzatiladi. Havo harorati asta-sekin ko‘tariladi va 21-aprelga kelib kechasi 4-9 daraja iliqni, kunduzi 20-25 darajani tashkil etadi.

17-aprel kuni sel-suv toshqin hodisalari yuzaga kelishi mumkin.

Toshkentda yog‘ingarchilik kutilmaydi. Shamol 5-10 m/s tezlikda esadi. 17–18-aprel kunlari havo harorati 12-15 daraja atrofida bo‘ladi. Dushanbadan seshanbaga o‘tar kechasi harorat 2-4 daraja iliqqacha pasayadi.

19-apreldan ish haftasining oxirigacha kechalari harorat 4-7 daraja iliq atrofida bo‘ladi, kunduzi asta-sekin ko‘tariladi va juma kuniga kelib harorat 20-23 darajagacha ko‘tariladi.